پشاور میں سرد ہواؤں سے موسم خوشگوار

اسلام ٹائمز۔ صوبائی دارالحکومت پشاور سمیت صوبے کے میدانی علاقوں میں بارشوں اور ہواؤں کے باعث موسم تبدیل ہو گیا ہے۔ شہر میں گذشتہ شب سے تیز ہواؤں کا سلسلہ بھی جاری رہا، جبکہ علی الصبح بارش سے بیشتر نشیبی علاقے بھی زیر آب آگئے۔ بعض علاقوں میں بجلی بھی غائب ہوگئی۔ محکمہ موسمیات نے لوگوں کو تیز آندھی سے بچنے کیلئے احتیاطی تدابیر اپنانے کی تلقین کی ہے۔ مغربی ہواؤں کا نیا سلسلہ پاکستان میں داخل ہوچکا ہے جس کے تحت ملک کے مختلف علاقے تین روز تک طوفانی ہواؤں کی زد میں رہیں گے۔