وزیراعلیٰ خیبر پختونخوا نے سوات موٹروے ٹنل کا افتتاح کر دیا

اسلام ٹائمز۔ وزیراعلٰی خیبر پختونخوا محمود خان نے سوات موٹروے کے مین ٹنل کا افتتاح کرتے ہوئے اسے ٹریفک کیلئے کھول دیا ہے۔ وزیراعلٰی کا کہنا ہے کہ منصوبہ بہت جلد مکمل ہو کر علاقہ ترقی کی راہ پر گامزن ہوگا۔ وزیراعلٰی خیبر پختونخوا محمود خان نے سوات موٹروے کا دورہ کیا جہاں انہوں نے جاری تعمیراتی کام کا معائنہ کیا اور موٹروے میں زیر تعمیر ٹنل میں بلاسٹ کرکے کھول دیا۔ ایف ڈبلیو او حکام نے وزیراعلٰی خیبر پختونخوا کو منصوبے کے حوالے سے بریفنگ دی۔ اس موقع پر جنرل آپریشنل کمانڈر میجر جنرل خالد سعید بھی ان کے ہمراہ تھے۔ افتتاحی تقریب کے بعد میڈیا سے گفتگو کرتے ہوئے وزیراعلٰی کے پی کے محمود خان نے کہا کہ اس منصوبے کی تکمیل سے مالاکنڈ ڈویژن سیاحتی حب ثابت ہوگا، جبکہ لوگوں کو روزگار کے بہتر مواقع میسر ہوں گے۔ محمود خان نے مزید کہا کہ اس منصوبے کا 50 کلومیٹر کام مکمل ہوچکا ہے، تاہم اکتوبر کے آخر تک عوام کی سہولت کیلئے کھول دیا جائے گا۔