پاکستان کا یو این سے مسئلہ کشمیر حل کرانے کا مطالبہ

اسلام ٹائمز۔ وزیر خارجہ شاہ محمود قریشی نے سیکرٹری جنرل یو این او انتونیو گوتریز سے مطالبہ کیا ہے کہ وہ مسئلہ کشمیر اقوام متحدہ کی قراردادوں کے مطابق حل کروائیں۔ نیویارک میں موجود وزیر خارجہ شاہ محمود قریشی نے سیکرٹری جنرل اقوام متحدہ انتونیو گوتریز سے ملاقات کی، ملاقات میں جنوبی ایشیا کی صورتحال پر تفصیلی گفتگو ہوئی، جس میں دونوں رہنماؤں نے بات چیت کے ذریعے علاقائی امن کی اہمیت پر اتفاق کیا۔ شاہ محمود قریشی سے ملاقات کے دوران سیکرٹری جنرل اقوام متحدہ انتونیو گوتریز نے عالمی امن کیلیے پاکستانی کوششوں کا اعتراف کیا اور کہا کہ پاکستان اقوام متحدہ کا معتبر شراکت دار ہے۔ وزیر خارجہ شاہ محمود قریشی نے انتونیو گوتریز کو مقبوضہ کشمیر میں بھارتی مظالم پر بریفنگ دی اور مقبوضہ کشمیر میں بھارتی فوج کے کردار اور مظالم پر اظہار تشویش کرتے ہوئے مطالبہ کیا کہ وہ مسئلہ کشمیر حل کروائیں، انہوں نے مطالبہ کیا کہ مسئلہ کشمیر اقوام متحدہ کی قراردادوں کے مطابق حل ہونا چاہیے تاہم اقوام متحدہ کشمیر سے متعلق اپنی قراردادوں پر عملدرآمد کروائے۔ انہوں نے سیکرٹری جنرل یو این او سے مطالبہ کیا کہ مسئلہ کشمیر کا پر امن حل کشمیریوں کی خواہشات کے مطابق ہونا چاہیے۔ شاہ محمود قریشی نے سیکرٹری جنرل یو این او سے گفتگو میں کہا کہ بھارت کو مہم جوئی سے باز رہنا چاہیے کیوں کہ پاکستان خطے میں دیرپا امن کیلیے بھارت سے مذاکرات چاہتا ہے اور بھارت سے تمام معاملات پر بات چیت کیلیے تیار ہے تاہم اس کے لیے وہ اپنا کردار ادا کریں۔ وزیر خارجہ نے انتونیو گوتریز کو یقین دلایا کہ افغانستان میں بھی مذاکرات سے ہی امن و استحکام لایا جا سکتا ہے۔