طاغوتی قوتیں علماء کا راستہ روک کر اپنے مذموم مقاصد کے حصول کی کوشش کر رہی ہیں، مولانا راشد سومرو

انہوں نے کہا کہ جمعیت علماء اسلام کو یہ اعزاز حاصل ہے کہ یہ ہر تین سال بعد انٹراپارٹی انتخابات منعقد کراتی ہے، گلگت بلتستان میں رکنیت سازی محدود ہونے کی وجہ سے جے یو آئی کے آئین میں خصوصی حیثیت دینے کی تجویز زیر غور ہے جسے آئندہ مرکزی مجلس عمومی میں پیش کیا جائیگا، دیگر صوبوں سے تین ہزار اراکین پر ایک ممبر کو مرکز میں نمائندگی دی جاتی ہے کوشش ہوگی کہ پانچ سو یا ایک ہزار اراکین پر گلگت بلتستان سے ممبرمنتخب کیا جائے۔ انہوں نے کہا کہ جمعیت علماء اسلام کا روز اول سے اصولی موقف رہا ہے کہ وفاق کو مضبوط کرنے کے لئے صوبوں کو مضبوط کیا جائے، گلگت بلتستان کے حوالے سے بھی ہم اٹھارویں ترمیم کے طرز پر اختیارات کی منتقلی کے حامی ہیں، گلگت بلتستان ملک کا خوبصورت علاقہ ہے اور یہاں کے لوگ محب وطن پاکستانی ہیں۔ انہوں نے کہا کہ ماضی کی حکومتیں تین سال تک اقدامات اٹھاتی تھیں اور تین سال کے بعد ان پر تنقید کا سلسلہ شروع ہوتا تھا، تحریک انصاف کی پہلی حکومت ہے جو کہ 11 روز کے بعد ہی تنقید کی زد میں آئی ہے، یہ تنقید مخالفین نے نہیں کی ہے بلکہ میڈیا نے شروع کی ہے جمعیت علماء اسلام نے نئی حکومت کو موقع دینے کا فیصلہ کیا ہے اسی لئے تحریک انصاف ہماری نظر میں ٹیسٹ پیریڈ سے گزر رہی ہے اس کے بعد ہمارا مرحلہ شروع ہوگا۔