مقبوضہ کشمیر، انتخابات سے قبل بھارت نے اہم حریت رہنمائوں کو نظربند کر دیا

بھارتی پولیس نے متعدد حریت رہنماؤں کو نظربند کیا ہے تاکہ وہ انتخابات کے دوران بائیکاٹ کی مہم نہ چلا سکیں۔ بھارتی پولیس نے منگل کو جموں و کشمیر لبریشن فرنٹ کے چیئرمین محمد یاسین ملک کو سری نگر کے علاقے آبی گزر میں ان کے دفتر سے گرفتار کیا تاکہ وہ الیکشن کے دوران بائیکاٹ کی مہم نہ چلا سکیں۔ جموں و کشمیر لبریشن فرنٹ کے مطابق گزشتہ کچھ دنوں کے دوران پارٹی کے متعدد رہنماؤں اور کارکنوں کو گرفتار کر کے سلاخوں کے پیچھے ڈال دیا گیا ہے تاکہ وہ انتخابات کے خلاف مہم نہ چلا سکیں۔

اس سے قبل 27ستمبر کو بھارتی پولیس نے آل پارٹیز حریت کانفرنس کے مرکزی ترجمان غلام احمد گلزار کو سری نگر میں واقع ان کی رہائش گاہ سے گرفتار کیا تھا اور ان کے خلاف پبلک سینفٹی ایکٹ کے تحت مقدمہ درج کیا گیا تھا جس کے بعد وہ جموں کی کوٹ بھلول جیل میں قید ہیں۔ آل پارٹیز حریت کانفرنس کے دیگر رہنماؤں حکیم عبدالرشید، محمد یاسین عطائی اور سید امتیاز حیدر کو بھی غیرقانونی حراست میں رکھا ہوا ہے۔ یہاں یہ بات بھی قابل ذکر ہے کہ آل پارٹیز حریت کانفرنس کے رہنما 2010ء سے سری نگر میں واقع اپنی رہائش گاہ پر مستقل نظربندی کا سامنا کر رہے ہیں جبکہ حکام نے حریت رہنما مختار احمد کو بھی اسلام آباد ٹاؤن میں گھر میں نظربند کر کے رکھا ہوا ہے۔