بمبئی حملوں سے متعلق متنازعہ بیان، غداری کے الزام پہ نواز شریف لاہور ہائیکورٹ میں پیش ہونگے

اسلام ٹائمز۔ سابق وزرائے اعظم نواز شریف اور شاہد خاقان عباسی غداری کے الزام میں کارروائی کرنے کے کیس کا سامنا کرنے آج لاہور ہائیکورٹ میں پیش ہوں گے۔ لاہور ہائیکورٹ میں میڈیا انٹرویو کی بنیاد پر دونوں رہنماؤں کے خلاف درخواست زیرسماعت ہے، جسٹس مظاہر نقوی کی سربراہی میں 3 رکنی فل بینچ کیس کی سماعت کرے گا، بینچ کے دیگر اراکین میں جسٹس عاطر محمود اور جسٹس مسعود جہانگیر شامل ہیں۔ ہائیکورٹ کے فل بینچ نے نواز شریف اور شاہد خاقان عباسی کو حلف کی پاسداری نہ کرنے کے الزام میں طلب کیا تھا۔ ذرائع کا کہنا ہے کہ سابق وزیراعظم نواز شریف آج ہائیکورٹ میں پیش ہوں گے جب کہ شاہد خاقان عباسی کی بھی پیشی کا امکان ہے۔ لاہور ہائیکورٹ اور اطراف میں سکیورٹی کے سخت انتظامات کرتے ہوئے پولیس کی اضافی نفری طلب کرلی گئی ہے۔ شہری درخواست گزار آمنہ ملک نے سابق وزیراعظم نواز شریف کے انگریزی اخبار کو دیئے گئے متنازع انٹرویو کو بنیاد بناتے ہوئے لاہور ہائیکورٹ میں درخواست دائر کی جس میں استدعا کی ہے کہ نواز شریف اور شاہد خاقان عباسی نے وزارت عظمٰی کے حلف کی پاسداری نہیں کی اس لئے دونوں کے خلاف بغاوت کی کارروائی کی جائے۔

سابق وزیراعظم نواز شریف کا اپنے متنازع بیان میں کہنا تھا کہ عسکری تنظیمیں نان اسٹیٹ ایکٹرز ہیں اور ممبئی حملوں کے لئے پاکستان سے غیر ریاستی عناصر گئے، کیا یہ اجازت دینی چاہیئے کہ نان اسٹیٹ ایکٹرز ممبئی جا کر 150 افراد کو ہلاک کردیں، بتایا جائے ہم ممبئی حملہ کیس کا ٹرائل مکمل کیوں نہیں کرسکے۔ نواز شریف کے بیان پر بھارتی میڈیا نے اسے پاکستان کے خلاف استعمال کیا جبکہ ملکی سیاسی رہنماؤں کی جانب سے نواز شریف کے بیان کی شدید مذمت کی گئی۔ نواز شریف کے ممبئی حملوں سے متعلق متنازع بیان پر پاک فوج کی تجویز پر قومی سلامتی کمیٹی کا ہنگامی اجلاس اس وقت کے وزیراعظم شاہد خاقان عباسی کی زیرصدارت ہوا جس میں نواز شریف کے بیان کو بےبنیاد قرار دیا گیا اور اس کی مذمت بھی کی گئی۔ نواز شریف کے بیان کے بعد شاہد خاقان عباسی نے وزیراعظم کی حیثیت سے سابق وزیراعظم نواز شریف سے ملاقات کی اور انٹرویو کے بعد پیدا ہونے والی صورتحال سے آگاہ کیا۔ درخواست گزار نے اپنی درخواست میں مؤقف بھی اختیار کیا کہ نواز شریف نے متنازعہ انٹرویو دے کر ملک و قوم سے غداری کی جبکہ شاہد خاقان عباسی نے قومی سلامتی کمیٹی کی کارروائی سابق وزیراعظم کو بتا کر حلف کی پاسداری نہیں کی اس لئے دونوں کے خلاف بغاوت کی کارروائی کی جائے۔