QR Code

عمران خان کی حکومت کی سماجی و معاشی ترجیحات گلوبل ایجنڈا 2030ء کے مطابق ہیں، ملیحہ لودھی

11 Oct 2018 10:20

اقوام متحدہ کی جنرل اسمبلی کی کمیٹی سےخطاب میں ملیحہ لودھی نے کہا کہ حکومتی اسٹرکچرمیں بہتری، احتساب، شجرکاری، صحت اور تعلیم میں اصلاحات، زراعت کا فروغ، سستی توانائی اور پانی ذخیرہ کرنا نئی حکومت کی ترجیحات میں شامل ہے۔

اسلام ٹائمز۔ اقوام متحدہ میں پاکستان کی مستقل مندوب ملیحہ لودھی کا کہنا ہے کہ عمران خان کی حکومت کی سماجی و معاشی ترجیحات گلوبل ایجنڈا 2030ء کے مطابق ہیں۔ اقوام متحدہ کی جنرل اسمبلی کی کمیٹی سےخطاب میں ملیحہ لودھی نے کہا کہ وزیراعظم کی پالیسیوں کا مقصد معیشت میں نئی جان ڈالنا ہے۔ ان کا مزید کہنا تھا کہ حکومتی اسٹرکچرمیں بہتری، احتساب، شجرکاری، صحت اور تعلیم میں اصلاحات،  زراعت کا فروغ، سستی توانائی اور پانی ذخیرہ کرنا نئی حکومت کی ترجیحات میں شامل ہے۔ پاکستانی مندوب نے پانی کے وسائل کے حوالے سے اٹھائے گئے حکومتی اقدامات پر بھی روشنی ڈالی اور کہا کہ پاکستان اپنی پانی کی ضروریات اور مسائل سے واقف ہے، ہم نے حال ہی میں ایک نیشنل واٹر پالیسی تشکیل دی ہے، جس کے ذریعے پانی کو محفوظ کرنے کے لیے وسیع پیمانے پر منصوبوں کے حوالے سے کام جاری ہے۔ ملیحہ لودھی نے کہا کہ قدرتی وسائل کی تلاش اور خود انحصاری حکومتی اقدامات کا بنیادی جزو ہے جبکہ احتساب اور لوٹی ہوئی دولت کی واپسی بھی نئی پاکستانی حکومت کے ایجنڈے میں شامل ہے۔ ان کا کہنا تھا، ہم اس بات پر پختہ یقین رکھتے ہیں کہ رقوم کے غیر قانونی بہاؤ اور لوٹی ہوئی دولت کی واپسی کے لیے عالمی تعاون کو مزید بڑھانے کی اشد ضرورت ہے۔ پاکستانی مندوب نے مزید کہا کہ گلوبل ایجنڈا 2030ء میں نو آبادیاتی اور محکوم ممالک کے عوام کے حقوق کا خیال رکھنا ہوگا۔
 

خبر کا کوڈ: 755189