پشاور:
اسلام ٹائمز۔ جے یو آئی ف کے سربراہ مولانا فضل الرحمان نے کہا ہے کہ وزارت داخلہ ان کے خلاف سازشوں میں مصروف ہے۔ پشاور میں جرگے سے ملاقات کے بعد میڈیا سے گفتگو میں مولانا فضل الرحمان نے کہا کہ پرویز مشرف کی طرح زرداری حکومت بھی نیب کو سیاسی مخالفین کے خلاف استعمال کر رہی ہے۔ انہوں نے کہا کہ وزارت داخلہ نے ان کی وطن آمد سے قبل بیان جاری کیا کہ مولانا فضل الرحمان کے خلاف دہشت گردوں نے حملے کا منصوبہ بنایا ہے، اس کے بعد اب یہ کہا جا رہا ہے کہ سعودی وزیرداخلہ پر حملے کے ملزمان کی گرفتاری میں جے یو آئی کے سربراہ نے کردار ادا کیا، مولانا فضل الرحمان نے کہا کہ وزارت داخلہ کا کردار مشکوک ہو گیا ہے۔