QR Code

تحریک انصاف کی حکومت میں تبدیلی صرف قیمتوں میں آئی ہے، سراج الحق

22 Oct 2018 19:29

کوئٹہ میں پریس بریفنگ کے دوران امیر جماعت اسلامی کا کہنا تھا کہ بلوچستان میں صرف 23 فیصد لوگوں کو پانی دستیاب ہے، جبکہ حکومتی سروے کیمطابق 64 فیصد لوگ ناخواندہ ہیں۔ غذائی قلت کے باعث سب سے زیادہ بچوں کی اموات اسی صوبے میں ہوتی ہیں۔

اسلام ٹائمز۔ امیر جماعت اسلامی پاکستان سراج الحق نے تحریک انصاف کی حکومت پر تنقید کرتے ہوئے کہا ہے کہ نئے پاکستان میں تبدیلی صرف قیمتوں میں آئی ہے۔ کوئٹہ میں پریس بریفنگ کے دوران امیر جماعت اسلامی پاکستان سراج الحق نے کہا کہ پہلے 60 روز میں حکومت کی کارکردگی مایوس کن رہی۔ مہنگائی سے لوگ بے حد پریشان ہیں۔ تبدیلی صرف قیمتوں میں آئی ہے۔ چہرے بدلے ہیں، پر نظام نہیں۔ 25 جولائی کو انتخابات اگر شفاف ہوتے تو نتائج کچھ اور ہوتے۔ آئی ایم ایف کے پاس جانے سے ہماری آئندہ نسلیں قرضے کے ہمالیہ کے نیچے دب جائیں گی۔ گیس بلوچستان سے نکلتی ہے، لیکن 99 فیصد صوبہ اس سے محروم ہے۔ حکومتی سروے کے مطابق سب سے زیادہ گھوسٹ اسکول اور استاتذہ بھی یہاں ہیں۔ ٹرانسپیرنسی انٹرنیشنل کے مطابق 66 فیصد کرپشن اسی صوبے میں ہے۔ بلوچستان میں صرف 23 فیصد لوگوں کو پانی دستیاب ہے، جبکہ حکومتی سروے کے مطابق 64 فیصد لوگ ناخواندہ ہیں۔ غذائی قلت کے باعث سب سے زیادہ بچوں کی اموات اسی صوبے میں ہوتی ہیں۔

خبر کا کوڈ: 757316