QR Code

پشاور پولیس نے سکھوں کو بغیر ہیلمٹ موٹرسائیکل چلانے کی اجازت دیدی

25 Oct 2018 17:58

ٹریفک پولیس نے پشاور میں سکھوں کو بغیر ہیلمٹ موٹر سائیکل چلانے اجازت دیدی، تاہم اشارہ توڑنے اور غلط کراسنگ سمیت تمام ٹریفک قوانین کو فالو کرنا لازم ہوگا۔

اسلام ٹائمز۔ پشاور میں پولیس نے سکھوں کو بغیر ہیلمٹ موٹر سائیکل چلانے کی اجازت دیدی۔ تفصیلات کے مطابق بھارت میں سکھوں کو ہیلمٹ پہننے سے مستثنٰی قرار دینے کی گونج پاکستان بھی آپہنچی، خیبر پختونخوا اسمبلی میں اقلیتی رکن سردار رنجیت سنگھ نے اسمبلی میں سکھوں کو موٹرسائیکل پر ہیلمٹ کی پابندی سے مستثنٰی قرار دینے کی آواز اٹھائی جس پر ٹریفک پولیس نے پشاور میں سکھوں کو بغیر ہیلمٹ موٹر سائیکل چلانے اجازت دیدی، تاہم اشارہ توڑنے اور غلط کراسنگ سمیت تمام ٹریفک قوانین کو  فالو کرنا لازم ہوگا۔ سکھ کمیونٹی کے سماجی کارکن بابا گورپال سنگھ نے کہا کہ صوبائی حکومت اور ٹریفک پولیس کے شکر گزار ہیں جنہوں نے ہمارے دیرینہ مطالبے کو عملی جامعہ پہنایا، سکھ کمیونٹی کے بیشتر نوجوان روزگار اور اسکول، کالج وغیرہ جانے کیلئے موٹر سائیکل کا استعمال کرتے ہیں اور ہیلمٹ نہ پہننے پر اکثر جرمانہ دینا پڑتا تھا تاہم پگ کی وجہ سے سکھ کمیونٹی کیلئے ہیلمٹ پہننا ناممکن ہے۔ ٹریفک پولیس نے سکھوں کو ڈرائیونگ لائسنس کے اجراء میں بھی تعاون کی یقین دہانی کروائی، ایس ایس پی ٹریفک پشاور کاشف زوالفقار کے مطابق اقلیتوں کے ساتھ ہر قسم کا تعاون کریں گے۔ سکھ کمیونٹی کی درخواست پر ان کو ہیلمٹ پہننے سے مستثنٰی  قرار دیا جاچکا ہے اور تمام فیلڈ افسران کو چالان دینے سے روک دیا گیا ہے جبکہ ہماری کوشش ہوتی ہے کہ اقلیتی برادی کو ڈرائیونگ لائسنس کے اجراء سمیت تمام امور میں زیادہ سے زیادہ سہولت دی جائے۔

خبر کا کوڈ: 757816