اسلام ٹائمز۔ اسپیکر قومی اسمبلی اسد قیصر نے کہا ہے کہ مدارس کیلئے نیا نصاب نہیں لارہے اور نہ ہی کوئی پالیسی بنائی جا رہی ہے۔ صوابی کے علاقے پنج پیر میں اجتماع سے خطاب کرتے ہوئے اسپیکر قومی اسمبلی اسد قیصر نے کہا کہ ہم نے خیبر پختونخوا کے اسکولوں میں ترجمہ قرآن نافذ کرایا اور نصاب میں عقیدہ ختم نبوت شامل کیا، پنجاب کے نصاب میں بھی عقیدہ ختم نبوت شامل کریں گے اور اسکولوں میں ترجمہ قرآن نافذ کریں گے۔ اسپیکر قومی اسملی نے کہا کہ مدارس سے متعلق غلط اطلاعات پھیلائی جا رہی ہیں، مدارس کیلئے نیا نصاب نہیں لارہے اور نہ ہی کوئی پالیسی بنائی جا رہی ہے، میرے اور عمران خان کے رہتے ایسا کوئی کام نہیں ہوسکتا۔ اسد قیصر کا کہنا تھا کہ مدارس اسلام کے قلعے اور امن کے داعی ہیں، مدارس ہمارے لئے اولین ترجیح ہیں۔