0
Thursday 1 Nov 2018 10:25

سندھ، پنجاب اور خیبر پختونخوا میں تعلیمی ادارے بند، بلوچستان میں تدریسی عمل جاری

سندھ، پنجاب اور خیبر پختونخوا میں تعلیمی ادارے بند، بلوچستان میں تدریسی عمل جاری
اسلام ٹائمز۔ آسیہ بی بی سے متعلق سپریم کورٹ کے فیصلے کے بعد مذہبی جماعتوں کے احتجاج کے پیش نظر سندھ، پنجاب اور خیبر پختونخوا میں تعلیمی ادارے بند اور بلوچستان میں تدریسی عمل جاری ہے۔ کراچی میں پرائیوٹ اسکولز ایسوسی ایشن کی جانب سے حالات کے پیش نظر آج تعلیمی ادارے بند رکھے گئے ہیں جبکہ نجی اسکول ایسوسی ایشن نے محکمہ تعلیم سندھ سے اپیل کی ہے کہ موجودہ حالات کے پیش نظر اسکول بند رکھنے کا اعلان کیا جائے۔ پنجاب بھر میں تعلیمی ادارے آج بند ہیں جبکہ ترجمان پنجاب حکومت کا کہنا ہے کہ صوبے کے تمام ثانوی تعلیمی بورڈز کے تحت بارہویں جماعت کے آج ہونے والے پرچے ملتوی کر دیئے گئے جن کی نئی تاریخ کا اعلان بعد میں کیا جائے گا۔ تعلیمی اداروں میں تعطیل کے باعث لاہور کی شاہراہوں پر ٹریفک معمول سے کم ہے، چیئرنگ کراس مال روڈ، داتا دربار اور شاہدرہ چوک پر سڑکیں بلاک ہیں۔ صدر پرائیوٹ اسکولز ایسوسی ایشن کے مطابق وہاڑی بھر میں آج تمام نجی اسکولز بند ہیں، ملتان میں وفاقی تعلیمی بورڈ کے تحت پانچویں اور آٹھویں جماعت کے آج کے امتحانات ملتوی کر دیئے گئے، امتحان کی نئی تاریخ کا اعلان بعد میں کیا جائے گا۔

راولپنڈی تعلیمی بورڈ نے انٹرمیڈیٹ کے سپلیمنٹری امتحانات ملتوی کر دیئے، ترجمان کے مطابق آج صبح مطالعہ پاکستان اور شام کو شماریات اور ایجوکیشن کے پرچے تھے جن کی نئی تاریخوں کا اعلان بعد میں کیا جائے گا۔ یونیورسٹی آف سوات آج بند ہے جس کے باعث آج ہونے والے پرچے ملتوی کر دیئے گئے، یونیورسٹی انتظامیہ کے مطابق پرچوں کی نئی تاریخوں کا اعلان بعد میں کیا جائے گا۔ چار سدہ، دیر بالا، مالاکنڈ ڈی آئی خان اور بنوں میں تمام نجی تعلیمی ادارے بند ہیں، بنوں کی یونیورسٹی آف سائنس اینڈ ٹیکنالوجی میں آج ہونے والے پرچے ملتوی کر دیئے گئے۔ بلوچستان کے سیکرٹری تعلیم کے مطابق صوبے میں تمام سرکاری اسکول معمول کے مطابق کھلے رہیں گے۔ حکومت بلوچستان کی جانب سے آج اسکولوں میں تعطیل کا کوئی اعلان نہیں کیا گیا۔ کوئٹہ میں کیھتولک بورڈ، پاک ترک اسکول سمیت چند نجی اسکولوں کی انتظامیہ نے اسکولز بند رکھنے کا فیصلہ کیا ہے۔
خبر کا کوڈ : 758876
رائے ارسال کرنا
آپ کا نام

آپکا ایمیل ایڈریس
آپکی رائے

منتخب