0
Friday 7 Dec 2018 21:39

غیروں کیلئے لڑنے اور انکے سامنے ہاتھ پھیلانے کیوجہ سے ہماری غیرت ختم ہوگئی، عمران خان

غیروں کیلئے لڑنے اور انکے سامنے ہاتھ پھیلانے کیوجہ سے ہماری غیرت ختم ہوگئی، عمران خان
اسلام ٹائمز۔ وزیراعظم عمران خان نے کہا ہے کہ آج واضح کر دوں کہ کبھی کسی کی جنگ لڑیں گے اور نہ ہی کسی کے سامنے جھکیں گے، ہم سب سے امن چاہیں گے۔ اسلام آباد میں بلوچستان سے تعلق رکھنے والے طلبہ سے خطاب کرتے ہوئے وزیراعظم عمران خان نے کہا کہ قوم نظریئے سے ہے اور نظریہ نہ رہے تو قوم نہیں رہتی، قائداعظم نے پوری کوشش کی کہ مسلمان اور ہندو متحد ہوکر رہیں، قائداعظم نے محسوس کیا کہ مسلمانوں کے لئے الگ ملک ضروری ہے، ہمیں سمجھنا چاہیے کہ ملک کیوں بنا، آج بھارت میں جو مسلمانوں کا حال ہے، وہاں نظر ہی نہیں آتا کہ مسلمانوں کو برابر کے حقوق ملیں گے، بھارت میں مسلمانوں کا آج کوئی قائد نہیں ہے۔

انہوں نے کہا کہ جمہوریت کا مطلب حکمران کا قانون کے نیچے ہونا ہے، لیکن ہم جمہوریت سے بادشاہت پر آگئے، چین نے مدینہ کی ریاست کے اصولوں پر چل کر 70 کروڑ لوگوں کو غربت سے نکالا، مگر پاکستان میں امیر امیر ہوتا گیا اور غریب غریب ہی رہ گیا، جو علاقے آگے تھے، ان پر زیادہ پیسہ لگایا گیا، جس سے کم ترقی یافتہ علاقے مزید پیچھے رہ گئے۔ عمران خان کا کہنا تھا کہ اندازہ لگایا تو پتہ چلا کہ لاہور میں ایک انسان پر 70 ہزار روپے اوسطاً خرچہ کئے گئے، جبکہ چھوٹے علاقے راجن پور میں جہاں پیسے کی ضرورت تھی، وہاں اوسطاً ایک انسان پر اڑھائی ہزار روپے خرچ کئے گئے، اس طرح امیر اور غریب علاقوں میں فرق بڑھتا گیا۔ وزیراعظم نے مزید کہا کہ اس ملک کو اٹھانا ہے تو نبی کریمؐ کے اصولوں پر اٹھائیں گے، ہماری کوشش ہے کہ اپنے کمزور علاقوں کو آگے لائیں، بلوچستان پیچھے رہ گیا ہے، لیکن اب اسے اچھا وزیراعلیٰ ملا ہے، ہم خواتین کے لئے اسپیشل پروگرام لا رہے ہیں، ان کے جائیداد میں حصے کے لئے ایک قانون بنا رہے ہیں، جس پر عملدرآمد ہو۔

وزیراعظم عمران خان کا کہنا تھا کہ ہم نے پاکستان میں اپنے آپ پر ظلم کیا، ہمارے لیڈروں نے قوم اور دوسرے ملکوں کے سامنے تاثر دیا کہ اگر کسی سپر پاور کی مدد نہیں کریں یا ان کی جنگ نہیں لڑیں گے تو تباہ ہو جائیں گے۔ انہوں نے کہا کہ آج ہمارے عظیم ملک نہ بننے کی وجہ جھکنا اور ہاتھ پھیلانا ہے، جس نے ہماری قومی غیرت ختم کر دی، ہم نے اپنے لوگوں کو بتایا کہ سپر پاور کی جنگ نہ لڑی تو نہیں بچیں گے، مگر آج واضح کر دوں نہ کبھی کسی کی جنگ لڑیں گے اور نہ ہی کسی کے سامنے جھکیں گے، سب سے امن چاہیں گے۔ وزیراعظم کا کہنا تھا کہ افغانستان میں ہمیں ڈومور کہا گیا اور کہا گیا کہ پیسے دے رہے ہیں جنگ لڑیں، میں نے پہلے ہی کہا تھا کہ افغانستان میں جنگ مسئلے کا حل نہیں، شکر ہے جو ڈومور کہہ رہے تھے، وہ آج امن قائم کرنے اور مذاکرات کے لئے ہمیں کہہ رہے ہیں، ہم اسی طرح آگے بڑھیں گے اور یہ قوم عظیم بنے گی۔
خبر کا کوڈ : 765425
رائے ارسال کرنا
آپ کا نام

آپکا ایمیل ایڈریس
آپکی رائے

ہماری پیشکش