QR Code

سانحہ اے پی ایس پشاور میں بچھڑ جانیوالوں کی یاد ہمیشہ موجود رہیگی، عمران خان

16 Dec 2018 12:13

اپنے پیغام میں وزیراعظم عمران خان کا کہنا تھا کہ 16 دسمبر کے دلخراش واقعے نے دہشتگردی کیخلاف یکجہتی اور وحدت کو جنم دیا، سکیورٹی اداروں نے دہشتگردوں کیخلاف فیصلہ کن معرکہ سرانجام دیا، جسکی مثال نہیں ملتی۔

اسلام ٹائمز۔ وزیراعظم عمران خان کا کہنا ہے کہ سانحہ اے پی ایس پشاور میں بچھڑ جانے والوں کی یاد ہمیشہ موجود رہے گی جبکہ 16 دسمبر کے دلخراش واقعے نے دہشت گردی کے خلاف یکجہتی اور وحدت کو جنم دیا۔ سانحہ آرمی پبلک اسکول پشاور کے شہداء کی برسی پر اپنے پیغام میں وزیراعظم عمران خان کا کہنا تھا کہ 16 دسمبر کے دلخراش واقعے نے دہشتگردی کے خلاف یکجہتی اور وحدت کو جنم دیا، سکیورٹی اداروں نے دہشت گردوں کیخلاف فیصلہ کن معرکہ سرانجام دیا، جس کی مثال نہیں ملتی، معصوم جانوں نے لہو کا نذرانہ دے کر قوم کو سفاک دشمن کے خلاف متحد کر دیا۔

وزیراعظم عمران خان نے کہا کہ سانحہ اے پی ایس پشاور میں بچھڑ جانے والوں کی یاد ہمیشہ موجود رہے گی، شہیدوں کو خراجِ تحسین پیش کرنے کے ساتھ غمزدہ والدین سے دِلی ہمدردی کا اظہار کرتا ہوں، قوم معصوم شہداء کے والدین کے دکھ میں برابر کی شریک ہے، دنیا کی اس جنگ کی سب سے بھاری قیمت ہم نے ادا کی۔ وزیراعظم کا کہنا تھا کہ نقصانات کے باوجود ہم ملکی، علاقائی اور عالمی امن کے لئے پرعزم ہیں، تعلیم کی بدولت ہی انتہا پسندی اور دہشت گردی کو مستقل مات دے سکتے ہیں، فرقہ واریت، مذہب، لسانیت، رنگ و نسل یا کسی بھی طرز پر انتہا پسندی اور تشدد کو برداشت نہیں کیا جائے گا، افواج پاکستان اور قانون نافذ کرنے والے تمام اداروں کے ہیروز کو سلام پیش کرتا ہوں۔

خبر کا کوڈ: 766968