اسلام ٹائمز۔ سندھ اسمبلی میں اپوزیشن جماعتوں نے صوبائی حکومت کو ٹف ٹائم دینے کا حتمی فیصلہ کیا ہے۔ تفصیلات کے مطابق سندھ اسمبلی میں اپوزیشن جماعتوں پی ٹی آئی، متحدہ قومی موومنٹ پاکستان اور گرینڈ ڈیموکریٹک الائنس نے حکومت سندھ کو جے آئی ٹی رپورٹ، قائمہ کمیٹیوں کی عدم تشکیل، عوامی اور دیگر مسائل پر انتہائی ٹف ٹائم دینے کا فیصلہ کرلیا ہے۔ ذرائع کے مطابق متحدہ اپوزیشن نے اسمبلی کے اجلاس کے دوسرے دن قائمہ کمیٹیوں کی تشکیل نہ ہونے پر بھرپور احتجاج کا فیصلہ کیا ہے۔ اس احتجاج میں ایوان سے واک آوٹ کرکے سندھ اسمبلی کی سیڑھیوں پر بیٹھ کر احتجاج کیا جائے گا، جہاں متحدہ اپوزیشن کے ارکان اپنی اسمبلی لگائیں گے۔ ذرائع کا کہنا ہے کہ عوامی اسمبلی میں عوام کے مسائل پر بات کی جائے گی۔