اسلام ٹائمز۔ مردان میڈیکل کمپلیکس کی انتظامیہ کی بے حسی کے باعث ایک نوزائیدہ بچی کی جان چلی گئی۔ مردان شیدو کے رہائشی محمد اعجاز نے میڈیا کو بتایا کہ گذشتہ شب اپنی زوجہ کے ہمراہ ایمرجنسی کی حالت میں مردان میڈیکل ہسپتال گئے جہاں ان کے ہاں ایک بچی کی پیدائش ہوئی۔ اعجاز نے مزید بتایا کہ پیدائش کے بعد زچہ بچہ 3 گھنٹے تک سٹریچر پر جبکہ وہ بیڈ کے حصول کیلئے خوار ہوتے رہے، تاہم اسی اثناء میں ٹھٹھرتی سردی سے ان کی بچی موت واقع ہوئی، جبکہ ماں کی طبیعت بھی بگڑ گئی۔ انہوں نے وزیراعلٰی، وزیر صحت، ڈائریکٹر ہیلتھ اور دیگر متعلقہ حکام سے مطالبہ کیا کہ غفلت کی مرتکب ہسپتال انتظامیہ کے خلاف سخت سے سخت کارروائی کی جائے۔