پشاور پریس کلب کا پی ٹی ایم کو سیمینار کی اجازت دینے سے انکار

دوسری طرف پشاور پریس کلب کی انتظامیہ نے اس الزام کی سختی سے تردید کی ہے کہ پی ٹی ایم کا سیمینار کسی دباؤ کے نتیجے میں منسوخ کیا گیا ہے۔ پریس کلب کے صدر سید بخاری شاہ نے رابطہ کرنے پر میڈیا کو بتایا کہ پی ٹی ایم کے رہنماؤں کو واضح طورپر بتایا گیا تھا کہ چونکہ کلب میں تعیمراتی کام ہو رہا ہے لہٰذا ایسی صورت یہ ممکن نہیں ہو گا اور نہ ان کے پاس اتنے سارے افراد کے بیٹھنے کی گنجائش موجود ہے۔ انہوں نے کہا کہ اس کے علاوہ کلب کے عہدیدار بھی پی ٹی ایم کو سیمینار کی اجازت دینے پر منقسم تھے، لہٰذا مصلحت اسی میں جانی گئی کہ ان کو معذرت کی جائے۔ دریں اثنا پشتون تحفظ موومنٹ نے اپنے ایک سرگرم رہنما عالم زیب محسود کی گرفتاری اور ان کے خلاف مقدمے کے اندراج کے خلاف ملک بھر میں احتجاج کا اعلان کیا ہے۔ پی ٹی ایم ذرائع کے مطابق یہ احتجاج بدھ کو ملک کے مختلف شہروں کے پریس کلبوں اور عوامی مقامات پر کیا جا رہا ہے، جس میں عالم زیب محسود کی فوری رہائی کا مطالبہ کیا جائے گا۔ یاد رہے کہ کراچی پولیس نے عالم زیب خان محسود کو چہرے پر کپڑا باندھ کر، سنگین جرم کے مرتکب الزام میں پیش کئے جانے والے ملزم کی طرح انسداد دہشت گردی کی عدالت میں پیش کیا تھا، خیال رہے کہ عالم زیب محسود کو منگل کو کراچی میں گرفتاری کے بعد مقامی عدالت میں پیش کیا گیا تھا۔