0
Monday 11 Feb 2019 19:05

سعودی ولی عہد کیلئے ایک ہوٹل مکمل طور پر بک کر لیا گیا، سیکورٹی ٹیم پاکستان پہنچ گئی

سعودی ولی عہد کیلئے ایک ہوٹل مکمل طور پر بک کر لیا گیا، سیکورٹی ٹیم پاکستان پہنچ گئی
اسلام ٹائمز۔ سعودی عرب کے ولی عہد شہزادہ محمد بن سلمان کی پاکستان آمد کی تیاریاں شروع کردی گئی ہیں اور ان کی آمد کے پیش نظر ضروری سامان پاکستان پہنچا دیا گیا ہے۔ سیکیورٹی ذرائع کے مطابق سعودی ولی عہد محمد بن سلمان ممکنہ طور پر آئندہ ہفتے دورہ پاکستان پر آئیں گے اور ان کی آمد سے قبل تمام تر تیاریاں مکمل کر لی گئی ہیں۔ ذرائع نے کہا کہ محمد بن سلمان کی آمد کی پیش نظر اسلام آباد کے 2 بڑے ہوٹل مکمل طور پر جبکہ 2 جزوی طور پر بک کر لیے گئے ہیں اور سعودی عرب کے میڈیا نمائندے بھی پاکستان پہنچ گئے۔ سعودی ولی کی سیکیورٹی اور ڈاکٹرز کی ٹیم پاکستان پہنچ گئی اور دو روز پاکستان میں قیام کے سلسلے میں محمد بن سلمان کی ورزش کا سامان، فرنیچر، ضروری اشیا کے 5 ٹرک مقامی ہوٹل پہنچ چکے ہیں۔ محمد بن سلمان کے دورے کے دوران سعودی وفود اسلام آباد کے نجی ہوٹلوں میں قیام کریں گے، جبکہ سعودی ولی کا وزیراعظم ہاؤس میں قیام متوقع ہے۔

محمد بن سلمان پہلی مرتبہ پاکستان کے دورے پر آئیں گے، جہاں انہیں وزیر اعظم پاکستان عمران خان نے دورے کی دعوت دی تھی۔ پاکستان اور سعودی عرب کے درمیان کئی دہائیوں پرانے تعلقات ہیں اور سعودی ولی عہد کی پاکستان آمد کے موقع پر دونوں ملکوں کے درمیان متعدد معاہدوں پر دستخط متوقع ہیں۔ پاکستان کی وزارت خزانہ کے سینئر عہدیدار نے کہا کہ اب تک مذاکرات کے نتائج انتہائی مثبت ہیں اور یہ پاکستان کی تاریخ میں سعودی عرب کی سب سے بڑی سرمایہ کاری ہو گی۔ اس سرمایہ کاری کا محور بحیرہ عرب میں واقع اسٹریٹیجک اہمیت کی حامل گوادر بندرگاہ پر 10ارب ڈالر کی آئل ریفائنری اور آئل کمپلیکس کی تعمیر ہے جہاں یہ جگہ پاک چین اقتصادی راہداری منصوبے کا بھی مرکزی مقام ہے۔ گزشتہ ماہ وال اسٹریٹ جرنل نے رپورٹ کیا تھا کہ پاکستان کے بڑے تجارتی پارٹنر تصور کیے جانے والے سعودی عرب اور متحدہ عرب امارات نے وزیر اعظم پاکستان عمران خان کو 30ارب ڈالر سرمایہ کاری کی پیشکش کی تھی۔ واضح رہے کہ یمن میں مظالم، جمال خاشعقجی کے قتل سمیت بن سلمان کے ناپسندیدہ اقدامات کیخلاف پاکستان کی اہل تشیع اور اہل سنت شخصیات سخت احتجاج کر رہی ہیں۔
 
خبر کا کوڈ : 777379
رائے ارسال کرنا
آپ کا نام

آپکا ایمیل ایڈریس
آپکی رائے

ہماری پیشکش