امریکہ اور اسرائیل کیخلاف واحد موثر آواز صرف ایران اور حزب اللہ کی ہے، اعجاز ہاشمی

اسلام ٹائمز۔ جمعیت علما پاکستان کے سربراہ اور نائب صدر متحدہ مجلس عمل پیر اعجاز احمد ہاشمی نے کہا ہے کہ کشمیر اور فلسطین کے مظلوم مسلمان، عالم اسلام کے اتحاد کا تقاضا کرتے ہیں، اسلامی ممالک کا اقوام متحدہ کی سلامتی کونسل میں ویٹو پاور حاصل نہ کرنا بھی باعث شرم ہے، ایران اور سعودی عرب کو ایک دوسرے کیخلاف توانائیاں استعمال کرنے کی بجائے اسرائیل اور بھارت کیخلاف فلسطینیوں اور کشمیریوں کی جدوجہد آزادی کا ساتھ دینا چاہئے۔ لاہور میں جے یو پی کی میڈیا ٹیم سے گفتگو کرتے ہوئے انہوں نے کہا کہ اب تک دنیا بھر میں بسنے والے مظلوم مسلمانوں کی حمایت میں کوئی موثر آواز بلند نہیں ہو سکی، ہماری حکومتیں سعودی عرب اور ایران کے درمیان تعلقات میں توازن قائم نہیں رکھ سکیں، ہمارا واضح جھکاو مخصوص عرب ممالک کی طرف ہوگیا ہے، افغانستان میں امریکہ ایک بار پھر ہمیں استعمال کر رہا ہے اور طالبان سے مذاکرات کی کامیابی پاکستان کے ذریعے چاہتا ہے۔

ان کا کہنا تھا کہ افغانستان میں جنگ اور بیرونی مداخلت کی وجہ سے عالمی سطح پر بدامنی پیدا ہوئی، آج دنیا بھر میں اگر کسی قومیت کا خون سستا ہے تو وہ صرف مسلمان ہیں، جنہیں مکار یہودی فلسطین اور ہندو بنیا کشمیر میں قتل کر رہا ہے، گویا 70 سال سے زائد عرصہ ہوگیا اسرائیل اور بھارت کا شیطانی گٹھ جوڑ مسلمانوں کی نسل کشی میں مصروف ہے، مگر دنیا میں کوئی مذمت کرنے کو بھی تیار نہیں۔ پیر اعجاز ہاشمی نے واضح کیا کہ امریکی خارجہ پالیسی کا واحد مقصد اسرائیل کا تحفظ ہے، جس کیلئے اس نے پوری دنیا کو تباہی کے دہانے پر لاکھڑا کیا ہے۔ تاریخ انسانیت بتاتی ہے کہ عالمی سطح پر امریکہ اور اسرائیل کیخلاف واحد موثر آواز صرف ایران اور حزب اللہ کی ہے، جنہیں مختلف مسائل میں الجھا دیا گیا ہے لیکن پھر بھی یہ دونوں قوتیں بن کر فلسطین کے مسئلے پر کچھ نہی کچھ کردار ادا کرتی رہتی ہیں۔