خلیج تعاون کونسل (GCC) ایران کیساتھ افہام و تفہیم پیدا کرے، قطری وزیر خارجہ

اسلام ٹائمز۔ قطر کے وزیر خارجہ محمد بن عبدالرحمان آل ثانی نے خلیج تعاون کونسل (GCC) سے مطالبہ کیا کہ وہ ایران کے ساتھ افہام و تفہیم پیدا کرے۔ قطری وزیر خارجہ نے امریکہ سمیت دنیا کی بڑی طاقتوں سے مطالبہ کیا کہ وہ علاقے کے حوالے سے ایک جامع نکتہ نظر اپنائیں۔ انہوں نے کہا کہ وہ یکطرفہ منصوبے جن میں ایرانیوں یا فلسطینیوں کا خیال نہ رکھا جائے، کامیاب نہیں ہوں گے۔ روزنامہ گارڈین کی رپورٹ کے مطابق محمد بن عبدالرحمن آل ثانی کا کہنا تھا کہ حال حاضر میں جو بھی علاقے کی صورتحال اور اس میں ہونے والی صف آرائیوں کا جائزہ لے تو وہ پورے اطمینان سے یہ کہہ سکتا ہے کہ موجودہ حالات جوں کے توں نہیں رہیں گے۔ کسی پر بھی لمبے عرصے تک ظلم نہیں کیا جا سکتا، لہذا ہم علاقے کے سربراہان مملکت سے یہ چاہتے ہیں کہ اس عدم استحکام کی صورتحال سے بچنے کے لئے حالات کی اصلاح کا کام شروع کر دیں۔ اب یہ ضروری ہوگیا ہے کہ ہم ردّعمل پر مبنی سیاست کے بجائے اثرونفوذ کی سیاست اپنائیں۔ قطر کے وزیر خارجہ نے سعودی عرب سے مطالبہ کیا کہ وہ سعودی مخالف خبرنگار "جمال خاشقچی" کے قتل کے بارے میں ہونے والی تحقیقات میں تعاون کرے۔