بھارت الزام کی بجائے مسعود ازہر کیخلاف قابل قبول ثبوت فراہم کرے، شاہ محمود قریشی

اس کے بعد بھارت نے 26 فروری کو پاکستانی سرحدی حدود کی خلاف ورزی کرتے ہوئے پاکستان میں دہشت گرد کیمپ کو تباہ کرنے کا دعویٰ کیا تھا تاہم پاکستان نے اس دعوے کو مسترد کر دیا تھا۔ پاک فضائیہ نے اس موقع پر بروقت کارروائی کرتے ہوئے پاکستان میں دراندازی کرنے والے بھارتی طیاروں کو بھاگنے پر مجبور کردیا تھا۔ اگلے دن بھارتی دراندازی کے جواب میں پاکستان نے 2 بھارتی لڑاکا طیاروں کو مار گرایا تھا جس سے دونوں ممالک کے درمیان صورتحال انتہائی کشیدہ ہوگئی تھی۔ وزیر خارجہ کا کہنا تھا کہ ہم پاکستان اور خطے میں امن اور مفاہمت چاہتے ہیں، ہم مغربی سرحد پر مصروف ہیں، ہم مشرقی محاذ پر جارحیت اور اشتعال انگیزی نہیں چاہتے۔ انہوں نے کہا کہ ہماری حکومت کی پالیسی ہے کہ ہم بھارت سمیت کسی بھی ملک کے خلاف کسی بھی تنظیم یا فرد کو اپنی سرزمین دہشت گردی کے لیے استعمال نہیں کرنے دیں گے۔

جب شاہ محمود قریشی سے سوال کیا گیا کہ بھارت جیش محمد کے سربراہ کا نام عالمی دہشت گردوں کی فہرست میں ڈلوانے کا خواہشمند ہے، اس بارے میں وہ کیا سوچتے ہیں تو پاکستانی وزیر خارجہ نے کہا کہ ہم اشتعال انگیزی میں کمی کے لیے ہر قدم اٹھانے کو تیار ہیں، اگر ان کے پاس اچھے، ٹھوس ثبوت ہیں تو ہمارے ساتھ بیٹھیں اور بات کر کے مذاکرات شروع کریں۔ جب ان سے پوچھا گیا کہ کیا مسعود ازہر پاکستان میں ہیں اور کیا حکومت ان کا پیچھا کرے گی تو شاہ محمود قریشی کا کہنا تھا کہ میری معلومات کے مطابق وہ پاکستان میں ہیں، ان کی طبیعت اس حد تک خراب ہے کہ وہ گھر سے باہر نہیں نکل سکتے۔ انہوں نے بھارت پر زور دیا کہ وہ پاکستان کے ساتھ ثبوتوں کا تبادلہ کرے جو پاکستان کی عدالت میں قابل قبول ہوں۔ وزیر اعظم عمران خان کی جانب بھارتی پائلٹ ابھی نندن وردھمان کی رہائی کے حوالے سے وزیر خارجہ نے کہا کہ ہم نے بھارت پائلٹ کو جذبہ خیر سگالی کے تحت رہا کیا اور ہم محسوس کرتے ہیں کہ یہ پاکستان کی جانب سے اشتعال انگیزی کم کرنے کی خواہش کا واضح اظہار ہے۔