بیرون ملک پاکستانیوں کی جیل میں ہلاکتوں کی ذمہ دار وزارت داخلہ ہے، سپریم کورٹ

اسلام ٹائمز۔ سپریم کورٹ نے بیرون ملک پاکستانی قیدیوں کی واپسی سے متعلق رپورٹ طلب کرلی جبکہ عدالت نے کہا کہ بیرون ملک پاکستانیوں کی جیل میں ہلاکتوں کی ذمہ دار وزارت داخلہ ہے۔ سپریم کورٹ میں برطانیہ سے قیدیوں کی پاکستان منتقلی سے متعلق کیس کی سماعت ہوئی، جس میں سیکرٹری داخلہ کے پیش نہ ہونے پر عدالت نے شدید برہمی کا اظہار کیا۔ جسٹس اعجاز الاحسن نے ریمارکس دیئے کہ سیکرٹری داخلہ تو خود کو شہنشاہ سمجھتے ہیں، آج آخری موقع کے باوجود پیش نہیں ہوئے، سیکرٹری داخلہ کیوں پیش نہیں ہو رہے؟ جسٹس اعجاز الاحسن نے کہا کہ برطانیہ میں 423 قیدی جیلوں میں ہیں، تھائی لینڈ میں بھی پاکستانی جیلوں میں ہیں۔ جسٹس فیصل عرب نے ریمارکس دیئے کہ بھارت میں شاکر اللہ 16 سال قید میں رہا، 16 سال بعد اس کی لاش واپس آئی۔ سیکرٹری داخلہ نے عدالت کو بتایا کہ ہم قانون تبدیل کر رہے ہیں، اس پر جسٹس عظمت سعید نے ریمارکس دیئے کہ قانون نہیں سیکرٹری داخلہ کو تبدیل کرنے کی ضرورت ہے۔ بعد ازاں عدالت نے بیرون ملک پاکستانی قیدیوں کی واپسی سے متعلق رپورٹ طلب کرتے ہوئے سماعت ایک ہفتے کے لئے ملتوی کردی۔