سندھ کے نصاب تعلیم میں موسیقی کی تجویز قابل مذمت ہے، جماعت اسلامی

محمد حسین محنتی نے کہا کہ وزیر تعلیم سندھ اپنی ناکامی، گھوسٹ اسکول و اساتذہ کے خاتمے، سہولیات کی فراہمی کے اقدامات کرنے کی بجائے اسکول کے نصاب میں موسیقی کی تجویز دیکر سندھ میں نظام تعلیم کو مزید تباہ اور والدین کے زخموں پر نمک پاشی کر رہے ہیں۔ صوبائی امیر نے کہا کہ سندھ باب الاسلام ہے، نظریہ پاکستان و اسلامی اقدار کیخلاف کوئی بھی چیز برداشت نہیں کی جائے گی، سندھ کے نصاب تعلیم میں موسیقی کو لازمی مضمون کے طور پر شامل کیا گیا، تو اہلیان سندھ اس کی بھرپور مخالفت کریں گے۔ انہوں نے کہا کہ قرآن و سنت کے نعرے پر حاصل کئے گئے ملک میں ناچ گانے کی کبھی اجازت نہیں دی جا سکتی، وزیر تعلیم ادھر اُدھر کی باتیں کرنے کی بجائے سندھ میں تعلیم کی بہتری، گھوسٹ اسکولوں کے خاتمے اور میرٹ کو یقینی بنانے جیسے اقدامات کریں۔