سعودی بادشاہ اور ولی عہد کے درمیان اہم مسائل پر شدید اختلافات ہیں، برطانوی اخبار کا دعویٰ

اسلام ٹائمز۔ برطانوی اخبار نے دعویٰ کیا ہے کہ سعودی عرب کے فرمانروا شاہ سلمان بن عبدالعزیز اور ان کے بیٹے اور ملک کے ولی عہد شہزادہ محمد بن سلمان کے مابین یمن میں جنگ سمیت دیگر اہم مسائل پر "شدید اختلافات" جنم لے چکے ہیں۔ "دی گارجین" کی رپورٹ میں کہا گیا کہ دونوں اہم شخصیات کے درمیان اختلافات کی فضا ترکی میں سعودی قونصل خانے میں صحافی جمال خاشقجی کے قتل کے بعد پیدا ہوئی۔ واضح رہے کہ امریکی خفیہ ایجنسی "سی آئی اے" نے الزام لگایا تھا کہ ولی عہد شہزادہ محمد بن سلمان کے حکم پر جمال خاشقجی کو قتل کیا گیا۔ رپورٹ میں ذرائع کے حوالے سے بتایا گیا کہ رواں برس فروری کے اواخر میں صورتحال اس وقت مزید کشیدہ ہوگئی جب 83 سالہ شاہ سلمان نے مصر کا دورہ کیا، جہاں ان کے مشیروں نے انہیں خبردار کیا کہ ولی عہد کے خلاف اقدامات کی صورت میں انہیں غیر معمولی خطرہ ہے۔ اس حوالے سے مزید انکشاف کیا گیا کہ سعودی عرب کے بادشاہ کے مصاحبین نے انہیں ممکنہ طور پر خطرے سے آگاہ کیا، جس کے بعد وزارت داخلہ نے 30 سے زائد وفادار سکیورٹی اہلکاروں کو مصر روانہ کرکے پہلے سے موجود سکیورٹی اہلکاروں کو واپس بلا لیا۔ ذرائع کے مطابق سکیورٹی اہلکاروں کی فوری تبدیلی سے ظاہر ہوتا ہے کہ بادشاہ کی سکیورٹی کے لیے تعینات بعض افسران شہزادہ محمد بن سلمان کے انتہائی وفادار تھے۔