تھرکول سے بجلی کی پیداوار شروع، 330 میگا واٹ بجلی نیشنل گرڈ سسٹم میں شامل

ترجمان اینگرو کول مائنز کمپنی کے مطابق کوئلے سے بجلی بنانے کا ٹارگٹ ہدف سے تین ماہ قبل حاصل کرلیا، ابتدائی طور پر 330 میگا واٹ بجلی بنا کر نیشنل گرڈ سسٹم میں شامل کردی ہے، بجلی کی پیداوار کو مرحلہ وار بڑھایا جائے گا۔ ترجمان اینگرو کول مائنز کمپنی نے کہا کہ تھر کے 21 ہزار مربع کلو میٹر رقبے میں سے 9300 اسکوائر کلو میٹر اراضی میں کوئلہ موجود ہے، تھر میں پائے جانے والے 175 ارب ٹن کوئلے کے ذخائر دنیا کا چوتھا بڑا ذخیرہ ہے اور صرف بلاک ٹو میں کوئلے کی مقدار 2 ارب ٹن ہے۔

دوسری جانب وزیر توانائی سندھ امتیاز شیخ نے بھی پیپلز پارٹی کی قیادت اور سندھ کے عوام کو مبارک باد دی ہے۔ یاد رہے کہ تھرکول منصوبے کا آغاز 2011ء میں سندھ حکومت اور نجی کمپنیوں کے اشتراک سے ہوا اور توقع ظاہر کی جا رہی ہے کہ منصوبے کی تکمیل کے بعد 2020ء تک دو ہزار میگاواٹ بجلی کی پیدوار شروع ہوجائے گی۔ ماہرین کے مطابق تھر میں دریافت ہونے والا 20 سے 30میٹر کثافتی کوئلہ پاکستان کی صدیوں کی ضررویات کیلئے کافی ہے، ایک وقت میں اس سے چار روپے فی یونٹ بجلی کے ساتھ ساتھ دیگر بہت سی ضروریات باآسانی پوری کی جا سکتی ہیں، جبکہ کوئلے سے زمین کے اندر گیس، ڈیزل اور پیٹرول کا متبادل بھی تیار کیا جاسکتا ہے۔