اسلام ٹائمز۔ سابق وزیر اطلاعات پنجاب فیاض الحسن چوہان کی سنی گئی، دوبارہ کابینہ میں لینے کا فیصلہ۔ انتہائی باوثوق ذرائع نے "
اسلام ٹائمز" کو بتایا ہے کہ سابق وزیر اطلاعات فیاض الحسن چوہان کو دوبارہ کابینہ میں لینے کا فیصلہ کر لیا گیا ہے۔ اس حوالے سے وزیراعلیٰ پنجاب سردار عثمان بزدار نے وزارت مذہبی امور اور وزارت بلدیات دینے کے حوالے سے قریبی دوستوں سے رائے لی جس پر وزیراعلیٰ کے قریبی حلقوں نے یہ تجویز دی ہے کہ فیاض الحسن چوہان کیلئے وزارت بلدیات مناسب رہے گی۔ ذرائع کا کہنا ہے کہ وزیراعلیٰ پنجاب نے بھی اسی وزارت کے حوالے سے آمادگی ظاہر کی ہے۔ وزیراعلیٰ پنجاب جلد یہ تجویز وزیراعظم کو بھجوائیں گے اور وزیراعظم عمران خان کی منظوری کے بعد انہیں باضابطہ طور پر وزارت بلدیات کا قلمدان سونپ دیا جائے گا۔ اس سے قبل یہ قلمدان میاں محمودالرشید کے پاس ہے۔