اسلام ٹائمز۔ نیب خیبر پختونخوا نے سیاحتی مقام مالم جبہ اراضی اسکینڈل میں ریفرنس چیئرمین نیب کو بھجوا دیا ہے۔ ذرائع کے مطابق سیاحتی مقام مالم جبہ اراضی سکینڈل کے حوالے سے ریفرنس کی منظوری سے متعلق جواب تاحال نیب پشاور کو موصول نہیں ہوا۔ مالم جبہ اراضی اسکینڈل میں سابق وزیراعلٰی خیبر پختونخوا پرویز خٹک اور عاطف خان نیب کے سامنے پیش ہوئے ہیں، جبکہ وزیراعظم کے پرنسپل سیکرٹری اعظم خان اور سابق چیف سیکرٹری امجد علی خان نے بھی کیس میں بیانات ریکارڈ کروائے ہیں۔ ذرائع کا کہنا ہے کہ ایم ڈی ٹورازم مشتاق خان سمیت دیگر ملزمان نے بھی بیانات قلمبند کروائے ہیں۔ ملزمان پر مالم جبہ میں 275 ایکڑ سرکاری زمین غیر قانونی اونے پونے داموں لیز پر دینے کا الزام ہے۔ ذرائع کا مزید کہنا ہے کہ ملزمان کی گرفتاری اور ریفرنس پر حتمی فیصلہ نیب چیئرمین کی زیر صدارت ایگزیکٹیو بورڈ کے اجلاس میں ہوگا۔