اسلام ٹائمز۔ پاک فوج کے غازی اور شہداء کو اُن کی خدمات کے اعتراف میں اعلی فوجی اعزازات سے نوازا گیا، کور کمانڈر لاہور لیفیٹنٹ جنرل ماجد احسان نے اعزازات اور میڈلز تقسیم کئے۔ کور ہیڈ کوارٹرز آڈیٹوریم میں عسکری اعزازات دینے کیلئے پروقار تقریب کا انعقاد کیا گیا۔ کور کمانڈر لاہور لیفیٹنٹ جنرل ماجد احسان نے بطور مہمان خصوصی شرکت کی۔ کور کمانڈر نے 86 افسران و جوانوں کو عطا کئے جانیوالے عسکری اعزازات سے نوازا۔ اعلی کارکردگی پر 23 ستارہ امتیاز ملٹری، 48 کو تمغہ امتیاز ملٹری اور تمغہ بسالت سے نوازا گیا۔ شہدا کے اعزازات ان کے لواحقین نے وصول کئے۔ ترجمان پاک فوج کے مطابق یہ اعزازات ان افسران و جوانوں کو دیئے گئے ہیں جنہوں نے پاک فوج کی درخشاں روایات کو زندہ رکھا اور زمانہ جنگ و امن میں اپنے شعبوں اپنی جانوں کی پروا نہ کرتے ہوئے وطن کی حفاظت کی۔