ذوالفقار علی بھٹو ایک شخص کا نام نہیں بلکہ ایک نظریہ اور جدوجہد کا نام ہے، بیرسٹر مرتضی وہاب

اسلام ٹائمز۔ وزیراعلیٰ سندھ کے مشیر برائے اطلاعات، قانون و اینٹی کرپشن بیرسٹر مرتضی وہاب نے شہید ذوالفقار علی بھٹو کی چالیسویں برسی کے موقع پر اپنے پیغام میں کہا ہے کہ 4 اپریل 1979ء پاکستان کی تاریخ کا سیاہ ترین دن ہے۔ مشیر اطلاعات کا کہنا تھا کہ آج سے چالیس سال پہلے یہ 4 اپریل ہی کی تاریخ تھی جب جمہوریت کے بانی، ملک کو متفقہ آئین اور ملک کو عوامی حاکمیت کا تصور دینے والے کو پھانسی دی گئی۔ انہوں نے کہا کہ شہید بھٹو ہی تھے جنہوں نے پاکستان کو ایٹمی طاقت بنا دیا۔ بیرسٹر مرتضی وہاب نے کہا کہ شہید ذوالفقار علی بھٹو کا جرم بس یہ تھا کہ انہوں نے قوم کو سامراج کی غلامی سے نجات دلائی۔ مشیر اطلاعات سندھ بیرسٹر مرتضیٰ وہاب نے کہا کہ شہید ذوالفقار علی بھٹو ایک اشخص کا نام نہیں بلکہ ایک نظریہ اور جدوجہد کا نام ہے۔ ان کا مزید کہنا تھا کہ آج تک نہ تو ذوالفقار علی بھٹو شہید کو اور نہ ہی اس کے خاندان کے کسی فرد کو انصاف مل سکا ہے۔ بیرسٹر مرتضی وہاب نے کہا کہ شہید ذوالفقار علی بھٹو عوام کے دل میں ہمیشہ زندہ رہیں گے۔