QR Code
حکومت نے ’’نیا پاکستان ہاؤسنگ اسکیم اتھارٹی‘‘ کے قیام کی منظوری دیدی
9 Apr 2019 22:52
وفاقی وزیر اطلاعات نے بتایا کہ وفاقی ملازمین کیلئے اسلام آباد میں 25 ہزار اپارٹمنٹس تعمیر کئے جائینگے اور اس اسکیم کا وزیراعظم رواں ماہ کی 17 تاریخ کو افتتاح کرینگے جبکہ بلوچستان میں پہلے مرحلے میں ایک لاکھ 10ہزار اپارٹمنٹس بنائے جائینگے۔
اسلام ٹائمز۔ وفاقی کابینہ نے ملک بھر میں ’’نیا پاکستان ہاؤسنگ اسکیم اتھارٹی‘‘ بنانے کی منظوری دے دی ہے۔ وزیراعظم عمران خان کی زیر صدارت ہونے والے وفاقی کابینہ کے اجلاس میں ہونے والے فیصلوں پر میڈیا بریفنگ دیتے ہوئے وفاقی وزیر اطلاعات فواد چوہدری نے بتایا کہ کابینہ نے ’’نیا پاکستان ہاؤسنگ اسکیم اتھارٹی‘‘ کے قیام کی منظوری دے دی ہے، جس کے تحت ایک لاکھ 35 ہزار اپارٹمنٹس تیار کیے جائیں گے۔ وفاقی وزیر اطلاعات نے بتایا کہ وفاقی ملازمین کے لیے اسلام آباد میں 25 ہزار اپارٹمنٹس تعمیر کیے جائیں گے اور اس اسکیم کا وزیراعظم رواں ماہ کی 17 تاریخ کو افتتاح کریں گے جبکہ بلوچستان میں پہلے مرحلے میں ایک لاکھ 10ہزار اپارٹمنٹس بنائے جائیں گے۔
فواد چوہدری نے کابینہ کے فیصلوں سے مزید آگاہ کرتے ہوئے بتایا کہ یونس ڈھاگہ کو چیئرمین اسٹیٹ لائف انشورنس کا چارج دیا گیا ہے، جبکہ عمر رسول کو سرمایہ کاری بورڈ کا نیا سیکرٹری بنانے اور سیکرٹری ایوی ایشن کو چیئرمین سول ایوی ایشن کا چارج دیا گیا ہے، عالمی سطح کی میڈیا یونیورسٹی تعمیر کی بھی منظوری دی گئی۔ وفاقی وزیر اطلاعات و نشریات کا مزید کہنا تھا کہ متحدہ عرب امارات سے مختلف معاہدے طے پاگئے ہیں، جس میں ایک معاہدے کے تحت یو اے ای میں پاکستانیوں کی جائیدادوں کی تفصیلات ملیں گی۔ ان کا کہنا تھا کہ آئی ایم ایف کے ساتھ معاہدہ تکمیل کے قریب ہے۔
خبر کا کوڈ: 787812