یورپی ممالک بہت سست روی سے کام کر رہے ہیں، ایران

 
ایرانی وزیر خارجہ نے ایرانی انقلابی گارڈز سپاہ پاسداران کو امریکہ کی طرف سے دہشتگرد تنظیموں کی فہرست میں شامل کرنے کے بارے میں کہا کہ ایران نے اس اقدام کے ردعمل میں جو پہلا کام کیا وہ ایران کی قومی سلامی کونسل کی طرف سے خطے میں موجود امریکی کمانڈ سنٹر "سنٹکام" کو "دہشتگرد تنظیم" اور امریکی حکومت کو "دہشتگردوں کی پشت پناہی کرنے والی حکومت" قرار دینا تھا۔ انہوں نے مزید کہا کہ اس حوالے سے دوسرے اقدامات بھی ایرانی قومی اسمبلی میں زیرغور ہیں۔ انہوں نے کہا کہ امریکہ کے غیرقانونی اقدامات اور خطے میں انتہائی غلط امریکی سیاست پر مبنی ایک خط بھی ایرانی وزارت خارجہ کی طرف سے اقوام متحدہ کے سیکرٹری جنرل کو ارسال کیا گیا ہے، جبکہ اس حوالے سے میڈیا پر بھی اچھی کمپین چلائی گئی ہے۔ آج جبکہ سپاہ پاسداران کے خلاف امریکہ کا تازہ اقدام عملی صورت اختیار کرنے جا رہا ہے، ایرانی وزارت خارجہ کی طرف سے تمام ممالک کے وزرائے خارجہ کو خطوط ارسال کئے جائیں گے، جن میں اس حوالے سے اسلامی جمہوریہ ایران کے موقف اور اس امریکی اقدام کے خطرناک نتائج کو اجاگر کیا جائے گا۔
 
محمد جواد ظریف نے ایران میں سیلابی صورتحال میں جاری بین الاقوامی امدادی سرگرمیوں میں امریکہ کے روڑے اٹکانے کی کوششوں سے متعلق کئے گئے سوال پر جواب دیتے ہوئے کہا کہ اس حوالے سے وسیع بنیادوں پر ڈپلومیٹک کام کا آغاز  کر دیا گیا ہے، جس کے نتیجے میں امریکی حکومت دفاعی موقف اختیار کرنے پر مجبور ہوئی ہے۔ انہوں نے کہا کہ ایران میں آنے والے سیلاب کے دوران بین الاقوامی سطح پر جاری امدادی کارروائیوں میں رکاوٹیں ڈالے جانے کے حوالے سے ہم ثبوت جمع کر رہے ہیں، جن کو جلد ہی منظر عام پر لایا جائے گا جن سے یہ ظاہر ہوتا ہے کہ بینک حتی یورپی بینک بھی امریکہ کے مخاصمانہ اقدامات سے ڈرتے ہوئے امدادی رقوم حاصل کرنے سے گریزاں ہیں۔ ایرانی وزیر خارجہ نے مزید کہا کہ سیلاب کے دوران بین الاقوامی سطح پر ایرانی عوام کے ساتھ اظہار یکجہتی پر مبنی یہ امدادی کارروائیاں امریکہ کے تخریبی اور غیرانسانی اقدامات کی وجہ سے متاثر ہوئی ہیں، جبکہ امریکی اب اپنے کئے کی نفی کرنے پر مجبور ہیں۔ ہم امدادی کارروائیوں کے خلاف امریکی اقدامات پر ثبوت جمع کر رہے ہیں، جن سے بشریت کے خلاف جرائم میں امریکیوں کی عملی مشارکت ثابت ہوتی ہے۔