اسلام ٹائمز - وفاقی کابینہ نے ادویات کی قیمتوں میں کمی کی منظوری دیدی

وفاقی کابینہ نے ادویات کی قیمتوں میں کمی کی منظوری دیدی

میڈیا کو بریف کرتے ہوئے معاون خصوصی برائے اطلاعات فردوس عاشق اعوان نے بتایا کہ وزیر صحت ڈاکٹر ظفر نے ادویات کی قیمتوں میں حالیہ اضافے پر اپنی سفارشات سے آگاہ کیا۔ فردوس عاشق اعوان نے کہا کہ وزیرصحت نے دوا ساز کمپنیوں کی جانب سے سیکڑوں ادویات میں من پسند اضافے کی نشاندہی کردی ہے۔

اسلام ٹائمز۔ وفاقی کابینہ نے ادویات کی قیمتوں میں کمی کی منظوری دیتے ہوئے سیکڑوں ادویات کی اپنی مرضی سے قیمتیں بڑھانے والی کمپنیوں سے اضافی منافع واپس لے کر بیت المال میں جمع کرانے کا فیصلہ کیا ہے۔ وزیراعظم عمران خان کی زیر صدارت وفاقی کابینہ کے اجلاس میں ہونے والے فیصلوں سے میڈیا کو بریف کرتے ہوئے معاون خصوصی برائے اطلاعات فردوس عاشق اعوان نے بتایا کہ وزیر صحت ڈاکٹر ظفر نے ادویات کی قیمتوں میں حالیہ اضافے پر اپنی سفارشات سے آگاہ کیا۔ فردوس عاشق اعوان نے کہا کہ وزیرصحت نے دوا ساز کمپنیوں کی جانب سے سیکڑوں ادویات میں من پسند اضافے کی نشاندہی کردی ہے، قیمتوں میں اضافے کے معاملے پر کمپنیوں نے ڈرگ پالیسی کا نہ صرف غلط استعمال کیا بلکہ اضافے کے لیے ملنے والے ریلیف کا ناجائزہ فائدہ بھی اٹھایا۔

معاون خصوصی برائے اطلاعات نے بتایا کہ حکومت نے ادویات کی اضافی قیمتوں کی مد میں حاصل شدہ منافع کمپنیوں سے واپس لینے کا فیصلہ کیا ہے جو وصول کرکے بیت المال میں جمع کرائی جائے گی۔ وزیراعظم کے دورہ ایران کے حوالے سے فردوس عاشق اعوان نے بتایا کہ کابینہ ارکان نے وزیراعظم کو ایران کے کامیاب دورے پر مبارکباد پیش کی، معاون خصوصی نے کہا کہ ایران صرف ہمسایہ ملک نہیں برادر اسلامی ملک ہے، ایران کے ساتھ کچھ غلطیاں فہمیاں پیدا ہو رہی تھیں ان کا تدارک ضروری تھا۔