QR Code

اسلام آباد ٹول پلازا پر وین کو حادثہ، 12 افراد جاں بحق اور 6 شدید زخمی

29 Apr 2019 21:47

اسلام آباد موٹر وے ٹول پلازا پر مسافروں سے بھری ایک ہائی ایس وین کو حادثہ پیش آیا ہے جس کے نتیجے میں 12 افراد جاں بحق ہوگئے۔ مرنے والے مسافروں میں دو خواتین، دو بچیاں اور 8 مرد شامل ہیں جن میں سے 6 افراد کی لاشیں بری طرح جلی ہوئی ہیں۔

اسلام ٹائمز۔ اسلام آباد ٹول پلازا پر بریک فیل ہونے سے ایک ہائی ایس وین کو حادثہ پیش آیا ہے جس کے باعث 12 افراد جاں بحق اور 6 افراد بری طرح جل گئے، جن کی حالت تشویشناک ہے۔ تفصیلات کے مطابق اسلام آباد موٹر وے ٹول پلازا پر مسافروں سے بھری ایک ہائی ایس وین کو حادثہ پیش آیا ہے جس کے نتیجے میں 12 افراد جاں بحق ہوگئے۔ مرنے والے مسافروں میں دو خواتین، دو بچیاں اور 8 مرد شامل ہیں جن میں سے 6 افراد کی لاشیں بری طرح جلی ہوئی ہیں۔ اسپتال ذرائع کے مطابق حادثے کے 12 مسافروں کی ڈیڈ باڈی پمز ہسپتال لائی گئی جبکہ 6 زخمی مسافروں کو پمز کے برن سینٹر لایا گیا ہے جن کا 90 فیصد جسم جل چکا ہے، ان میں ایک خاتون، ایک بچہ اور 4 مرد شامل ہیں جن کی حالت انتہائی تشویشناک ہے۔

ڈپٹی کمشنر اسلام آباد نے بتایا کہ تھانہ نصیر آباد پولیس کے مطابق گاڑی کے بریک فیل ہونے کے باعث حادثہ پیش آیا، گاڑی میں تین گیس سلنڈر بھی موجود تھے، جاں بحق افراد میں سے 4 کی شناخت ہوگئی ہے، ان میں فتح محمد، محمد اشرف، ذوالفقار اور محمد وقاص حیدر جبکہ زخمیوں میں محمد عمران، ریحان امجد، افضل مسیح، عمران پرویز اور سعد امین شامل ہیں۔
 

خبر کا کوڈ: 791362