0
Wednesday 8 May 2019 22:17
صوبائی وزیر ناصر حسین شاہ کا لاپتہ شیعہ افراد کے لواحقین کیساتھ اظہار یکجہتی

شیعہ لاپتہ افراد کے لواحقین کے مسئلہ کیلئے ہر فورم پر آواز اٹھاؤں گا، ناصر حسین شاہ

شیعہ لاپتہ افراد کے لواحقین کے مسئلہ کیلئے ہر فورم پر آواز اٹھاؤں گا، ناصر حسین شاہ
اسلام ٹائمز۔ پیپلز پارٹی کے رہنماء اور سندھ کے صوبائی وزیر ناصر حسین شاہ نے کہا ہے کہ ملک کو امن و امان، معیشت، کاروبار، امپورٹ ایکسپورٹ کی تشویشناک اور مایوس کن صورتحال کا سامنا ہے، ان تمام مسائل کے علاوہ ایک اہم مسئلہ لاپتہ افراد کا بھی ہے، جو 2001ء سے شروع ہوا اور رکنے کا نام نہیں لے رہا، کسی بھی فرد کو لاپتہ کرنا آئین اور بنیادی انسانی حقوق کی خلاف ورزی ہے، لاپتہ ہونے والے افراد چاروں صوبوں سے تعلق رکھتے ہیں، اگر ان پر الزام ہے تو انکو کورٹ میں پیش کیا جائے۔ سوشل میڈیا نیٹ ورک ٹوئیٹر پر ایک بیان میں ناصر حسین شاہ کا کہنا تھا کہ سرکاری اعداد و شمار کے مطابق ملک بھر سے چھ سو سے زائد افراد گمشدہ ہیں، جبکہ غیر سرکاری اعداد و شمار کے مطابق لاپتہ افراد کی تعداد ہزاروں میں ہے، جن کے زندہ یا مردہ ہونے کی تصدیق نہیں ہوسکی ہے۔ لاپتہ افراد کے اہل خانہ کو یہ تک نہیں معلوم کے ان کے پیارے زندہ ہیں یا نہیں اور وہ ہر پل اپنے بچوں، بیٹوں، بھائیوں کی واپسی کے منتظر نظر آتے ہیں، لاپتہ افراد اور جبری گمشدگی کا مسئلہ جمہوری اور مہذب معاشرے پر داغ ہے۔

ان کا کہنا تھا کہ لاپتہ افراد کا مسئلہ اور پاکستان کی عالمی ساکھ کے حوالے سے سوالات کا ابھرنا ہر محب وطن کے لئے پریشان کن بات ہے، لاپتہ افراد کا معاملہ انسانی حقوق کا انتہائی سنگین اور نازک معاملہ ہے۔ سید ناصر حسین شاہ کا کہنا تھا کہ لاپتہ افراد کے لواحقین، بوڑھے ماں باپ اور معصوم بچے سڑکوں پر سراپا احتجاج اور اپنے پیاروں کی تلاش میں ہیں، لیکن کوئی ان کی فریادوں پر کان دھرنے والا نہیں، موجودہ حکومت اور ریاستی ادارے لاپتہ افراد کو بازیاب کرکے قوم کی ماؤں، بہنوں اور بیٹیوں کے آنسو پونچھیں، یہ انسانی حقوق کا سنگین معاملہ ہے، میں لاپتہ افراد کے لواحقین کو یقین دلاتا ہوں کہ اس مسئلہ کے لئے ہر فورم پر آواز اٹھاؤں گا، لواحقین کا اپنے لاپتہ افراد کی عدم بازیابی کے خلاف احتجاج کرنا انکا جمہوری حق ہے۔ انہوں نے مزید کہا کہ میں امید کرتا ہوں کہ حکومت لاپتہ افراد کے سنگین مسئلے کو حل کرنے کیلئے بروقت اقدامات کو یقینی بنائے گی اور اپنی ترجیحات میں لاپتہ افراد کے بدترین انسانی المیہ کو ترجیح بنیادوں میں حل کرنے کے لئے اپنا کردار ادا کرے گی۔
خبر کا کوڈ : 793071
رائے ارسال کرنا
آپ کا نام

آپکا ایمیل ایڈریس
آپکی رائے

منتخب