اسلام ٹائمز - بجٹ میں کٹوٹی قوم پر احسان نہیں، دفاعی صلاحیت پر اثرانداز نہیں ہونے دینگے، آرمی چیف

بجٹ میں کٹوٹی قوم پر احسان نہیں، دفاعی صلاحیت پر اثرانداز نہیں ہونے دینگے، آرمی چیف

لائن آف کنٹرول پر جوانوں سے خطاب میں جنرل قمر جاوید باجوہ کا کہنا تھا کہ بجٹ کٹوتی کا فیصلہ قوم پر احسان نہیں، موجودہ حالات کا تقاضا ہے، بجٹ کٹوتی سپاہیوں کے معیار زندگی پر اثر انداز نہیں ہوگی۔ تنخواہ میں اضافہ نہ لینے کا فیصلہ بھی صرف افسران کا ہے، اس فیصلے کا اطلاق جوانوں پر نہیں ہوگا۔

اسلام ٹائمز۔ پاک فوج کے سپہ سالار جنرل قمر جاوید باجوہ نے عیدالفطر لائن آف کنٹرول پر موجود جوانوں کے ساتھ گزاری، ان کا کہنا ہے کہ دفاعی بجٹ میں اضافہ نہ لینے کا فیصلہ قوم پر احسان نہیں، یہ اقدام ہر قسم کے حالات میں یکجہتی کے عزم کا اعادہ ہے۔ بجٹ کٹوتی کو دفاعی صلاحیت پر اثرانداز نہیں ہونے دیں گے۔ پاک فوج کے شعبہ تعلقات عامہ کے مطابق آرمی چیف قمر جاوید باجوہ نے عید لائن آف کنٹرول پر فرائض سرانجام دینے والے جوانوں کے ساتھ گزاری اور نماز عید بھی ان کے ساتھ ہی ادا کی۔ اس موقع پر امن، قومی سلامتی اور استحکام پاکستان کیلئے خصوصی دعائیں کی گئیں۔