او آئی سی کے اجلاس میں عدم شرکت کے بعد ترک صدر کا سعودی فرمانروا کو ٹیلی فون

اسلام ٹائمز۔ ترک صدر رجب طیب اردوان نے مکہ المکرمہ میں اسلامی تعاون تنظیم (او آئی سی) کے اجلاس میں عدم شرکت کے بعد سعودی عرب کے شاہ سلمان کو ٹیلی فون کیا اور بات چیت کی۔ فرانسیسی خبررساں ادارے اے ایف پی کی رپورٹ کے مطابق ترک صدر کے دفتر سے جاری کیے گئے بیان کے مطابق دونوں ممالک کے سربراہان نے ایک دوسرے کو عید الفطر کی مبارک باد دی۔ بیان میں کہا گیا کہ رجب طیب اردوان اور شاہ سلمان نے دو طرفہ معاملات اور خطے کے مسائل سے متعلق بات چیت بھی کی۔ رجب طیب اردوان نے شاہ سلمان کو فون ایسے وقت میں کیا ہے جب گزشتہ ہفتے سعودی عرب میں منعقد ہونے والے او آئی سی اجلاس میں رجب طیب اردوان شریک نہیں تھے۔