اسلام ٹائمز۔ وزیر خزانہ گلگت بلتستان حاجی اکبر تابان نے کہا ہے کہ صوبائی حکومت ساڑھے 46 ارب روپے کا بجٹ 20 جون کو پیش کریگی، 15 ارب روپے ترقیاتی و ساڑھے اکتیس ارب روپے غیر ترقیاتی امور کیلئے مختص ہونگے، پی ایس ڈی پی صوبائی بجٹ سے علیحدہ ہو گا۔ میڈیا کو دیئے گئے انٹرویو میں اکبر تابان کا کہنا تھا کہ صوبائی حکومت کا بجٹ عوام دوست ہوگا، وفاق کی طرح یہاں بھی ملازمین کی تنخواہوں اور پنشن میں دس فیصد اضافہ ہوگا، ہماری حکومت کا یہ آخری بجٹ ہو گا، اس میں عوام کو ریلیف دینے کی کوشش کریں گے۔