QR CodeQR Code

خلیج فارس کے علاقے میں ہر قسم کے تناؤ سے پرہیز انتہائی ضروری ہے، اقوام متحدہ

24 Jun 2019 16:45

اقوام متحدہ کے سیکرٹری جنرل نے عالمی طاقتوں سے خلیج فارس کے علاقے میں مزید تناؤ نہ بڑھانے کا مطالبہ کرتے ہوئے کہا ہے کہ تمام فریق صبر و حوصلہ برقرار رکھتے ہوئے خلیج فارس کے علاقے میں ہر قسم کے تناؤ میں اضافے سے پرہیز کریں۔


اسلام ٹائمز۔ اقوام متحدہ کے سیکرٹری جنرل "انٹونیو گوٹیرس" نے پرتغال کے دارالحکومت "لزبن" میں "عالمی یوتھ منسٹرز کانفرنس" سے خطاب کرتے ہوئے عالمی طاقتوں سے خلیج فارس کے علاقے میں ہر قسم کے تناؤ میں اضافے سے پرہیز کرنے کا مطالبہ کیا ہے۔ انٹونیو گوٹیرس نے کہا ہے کہ تمام فریقین کو چاہیئے کہ وہ اپنا صبر و حوصلہ برقرار رکھیں اور ہر قسم کے تناؤ سے پرہیز کریں۔ واضح رہے کہ گذشتہ جمعے کے روز "گلوبل ہاک" نامی جدید ترین امریکی ڈرون طیارہ ایرانی فضائی حدود کی خلاف ورزی کرتا ہوا ایرانی صوبے ہرمزگان میں داخل ہوگیا تھا، جسے ایرانی انقلابی گارڈز "سپاہ پاسداران" نے "مبارک پہاڑی" نامی ایرانی علاقے کے قریب مار گرایا تھا۔ یہ امریکی جاسوس طیارہ گذشتہ جمعرات اور جمعے کی درمیانی شب 2:00 بجے متحدہ عرب امارات کی "الظفرہ" نامی ایئربیس سے اڑان بھر کر 10 کلومیٹر کی بلندی پر پہنچا۔

کئی گھنٹوں تک ایرانی سرحد کے ساتھ ساتھ بین الاقوامی سمندری حدود میں چکر لگانے کے بعد 15 کلومیٹر کی بلندی پر، جمعے کی صبح 4:05 پر ایرانی فضائی حدود میں داخل ہوگیا تھا جسے ایرانی سپاہ پاسداران نے "سوم خرداد" نامی ایرانی ایئرڈیفنس سسٹم کو استعمال کرتے ہوئے تباہ کر دیا تھا جبکہ ایرانی انقلابی گارڈز سپاہ پاسداران سے تعلق رکھنے والے ایرانی فضائی حدود کے کمانڈر "سردار حاجی زادہ" نے اعلان کیا تھا کہ اس امریکی جاسوس طیارے کو دو مرتبہ خبردار کیا گیا تھا، لیکن امریکی جاسوس طیارے نے انتباہات کی اعتناء نہ کرتے ہوئے اپنا سفر جاری رکھا۔ سردار حاجی زادہ کے مطابق امریکی جاسوس طیارے کو 3:55 پر فوجی اینٹی ایئر کرافٹ سسٹم کے ذریعے آخری بار خبردار کیا گیا تھا، لیکن دیئے گئے انتباہات پر امریکی جاسوس طیارے کی بےاعتنائی کی وجہ سے اسے تباہ کر دیا گیا۔


خبر کا کوڈ: 801239

خبر کا ایڈریس :
https://www.islamtimes.org/ur/news/801239/خلیج-فارس-کے-علاقے-میں-ہر-قسم-تناو-سے-پرہیز-انتہائی-ضروری-ہے-اقوام-متحدہ

اسلام ٹائمز
  https://www.islamtimes.org