روس اتحادی ممالک کو سائبر حملوں سے غیر مستحکم نہ کرے، برطانیہ

تھریسا مے نے پیوٹن کو کہا کہ سابق جاسوس پر حملے میں روس کے ملوث ہونے کے حوالے سے برطانیہ کے پاس ناقابل تردید شواہد موجود ہیں۔ انہوں نے واضح کیا کہ ہم تعلقات قائم کرنے کے لیے تیار ہیں تاہم اس کے لیے روسی حکومت کو اپنا راستہ تبدیل کرنا ہوگا۔ خیال رہے کہ روس کی جانب سے دونوں ممالک کے تعلقات میں تبدیلی کے مطالبے کے باوجود لندن نے واضح کردیا تھا کہ تھریسامے کی ولادی میر پیوٹن سے ملاقات روس سے تعلقات بحال ہونا ثابت نہیں کرتی۔ ولادی میر پیوٹن کے ترجمان دمیتری پیسکوف کا کہنا ہے کہ روسی صدر اور تھریسامے نے پہلی مرتبہ ون آن ون ملاقات کی جس میں صرف ان کے مترجم موجود تھے۔ انہوں نے صحافیوں سے گفتگو کرتے ہوئے بتایا کہ ملاقات میں تھریسامے نے جاسوس کے معاملے کے بارے میں بات کی، انہوں نے اس معاملے کو اٹھایا اور روسی صدر سے ضروری جوابات حاصل کیے۔

ان کا کہنا تھا کہ بعد ازاں دونوں میں تجارت اور معاشی روابط کے حوالے سے وفود کی سطح پر بھی ملاقات ہوئی۔ دمیتری پیسکوف کا کہنا تھا کہ دونوں رہنماؤں نے کاروبار کے مفاد میں باہمی معاشی تعاون کی ضرورت پر رضامندی کا اظہار کیا۔ خیال رہے کہ ماسکو اور لندن کے درمیان تعلقات مارچ 2018ء میں سابق روسی جاسوس اور ڈبل ایجنٹ اسکریپال اور ان کی صاحبزادی کی برطانیہ کے شہر سالسبری میں زہر دینے کے واقعے کے بعد خراب ہوئے تھے۔ روس کی جانب سے زہر دینے کے واقعے میں ملوث ہونے کی مسلسل تردید کی گئی تھی۔ رواں ماہ کے آغاز میں ولادi میر پیوٹن کا کہنا تھا کہ واقعے کے بعد دونوں ممالک کے درمیان تعلقات کا صفحہ پلٹنے کا وقت آگیا ہے۔ واضح رہے کہ روسی جاسوس اسکریپال نے برطانیہ کو خفیہ معلومات فروخت کرکے 2010ء میں وہیں قیام اختیار کرلیا تھا۔ گزشتہ سال انہیں اور ان کی صاحبزادی کو زہر دیا گیا تھا۔