0
Saturday 13 Jul 2019 20:23

پاکستان دشمن طاقتیں ہمیں دست و گریباں دیکھنا چاہتی ہیں، علامہ ناصر عباس جعفری

4 اگست کو اسلام آباد میں قائد شہید علامہ عارف حسین الحسینی کی برسی پر تاریخی قومی اجتماع منعقد کرینگے
پاکستان دشمن طاقتیں ہمیں دست و گریباں دیکھنا چاہتی ہیں، علامہ ناصر عباس جعفری
اسلام ٹائمز۔ مجلس وحدت مسلمین پاکستان کے سربراہ علامہ راجہ ناصر عباس جعفری نے لاہور میں ایم ڈبلیو ایم سنٹرل پنجاب کی صوبائی شوریٰ کے اجلاس سے خطاب کرتے ہوئے کہا کہ ہم مظلوموں کی حمایت جاری رکھیں گے، چاہے اس کیلئے ہمیں کتنی ہی قیمت کیوں نہ ادا کرنی پڑے۔ انہوں نے کہا کہ معاشرہ سازی کیلئے تعلیم اور انصاف کے نظام کو عام کرنا ہوگا، معاشرے سے ظلم کو مٹانا اور مظلوموں کو انکے حقوق دلانا انبیاء علیہم السلام کی سنتوں میں سے ہے۔ مجلس وحدت مسلمین مظلوموں، محروموں کی مددگار اور ظالموں جابروں کیخلاف سیسہ پلائی دیوار ہے۔ انہوں نے کہا کہ اس وقت پاکستان دشمن طاقتیں ہمیں دست و گریباں دیکھنا چاہتی ہیں، ہمارا دشمن ہم سے خوفزدہ ہے، کیونکہ آپ نے ان کے ناپاک منصوبوں کو ناکام بنایا ہے۔ انہوں نے کہا کہ عالمی استعماری قوتوں کو اس وقت دنیا بھر میں ذلت و رسوائیوں کا سامنا ہے، ہمیں بیدار قوم بن کر ملک اور اسلام دشمنوں کے سازشوں کا مقابلہ کرنا ہے۔

علامہ راجہ ناصر عباس کا کہنا تھا کہ مشرق وسطیٰ میں عالمی صہیونی و استعماری گروہ عبرتناک شکست سے دوچار ہیں، یہ شیطانی طاقتیں اب ہمیں آپس میں لڑانے کی سازشوں میں مصروف ہیں۔ انہوں ںے کہا کہ مجلس وحدت مسلمین کا ہدف ہے کہ قوم و ملت کو فرقوں میں تقسیم نہیں کرنا بلکہ ایک امت بن کر اسلام دشمنوں کا مقابلہ کرنا ہے، ہمارے حکمران عوام کی جان و مال کے تحفظ کے ذمہ دار ہیں، ملک میں مہنگائی اور گراں فروشی کے سبب ہر طبقہ پریشان ہیں۔ انہوں نے کہا کہ حکمران معاشی قارونوں کو لگام دینے کیلئے عملی اقدامات کرے، کرپشن کیخلاف بے رحمانہ اور بلا امتیاز کارروائی کے بغیر ملکی مسائل کا حل ممکن نہیں۔ علامہ راجہ ناصر عباس نے کہا کہ ان شاء اللہ 4 اگست کو اسلام آباد میں قائد شہید علامہ عارف حسین الحسینی کی برسی پر تاریخی قومی اجتماع منعقد کرینگے۔ انہوں نے کہا ملک بھر سے فرزندان اسلام و وطن اس عظیم الشان اجتماع میں بھر پور شرکت کریں گے۔
خبر کا کوڈ : 804907
رائے ارسال کرنا
آپ کا نام

آپکا ایمیل ایڈریس
آپکی رائے

منتخب