آیت اللہ شیخ ابراہیم زکزائی کی گرفتاری امریکی و سعودی ایماء پر کی گئی، علامہ حسین مسعودی

اسلام ٹائمز۔ ہیئت آئمہ مساجد امامیہ کے صدر علامہ حسین مسعودی نے اسلامک موومنٹ آف نائجیریا کے سربراہ آیت اللہ شیٰخ ابراہیم زکزائی اور ان کی اہلیہ کی بلاجواز گرفتاری پر سخت تشویش کا اظہار کیا اور کہا کہ انہیں گرفتاری کے ساتھ ساتھ زہر دینے کی سازش بھی کی گئی جس پر ملت اسلامیہ سراپا احتجاج ہے۔ اس سلسلے میں مسجد ایلیا پیر کالونی، جامع مسجد حیدری اورنگی ٹاؤن، مسجد و امام بارگاہ ہاشمیہ لیاقت آباد، مسجد حیدر کرار اورنگی ٹاؤن، باب فاطمہ امام بارگاہ لیاقت آباد نمبر10، اسلامک سینٹر عائشہ منزل کے علاوہ انچولی سوسائٹی، جعفر طیار سوسائٹی، نیو رضویہ سوسائٹی صفورا چورنگی، بڑا امام بارگاہ کھارادر اور دیگر مقامات پر احتجاجی اجتماعات ہوئے، جن سے مولانا اکرام حسین ترمذی، مولانا رجب علی بنگش، ڈاکٹر جواد شاہ، سلمان حسن ایڈووکیٹ، مولانا مردان علی، مولانا حسنین شریفی، مولانا مرزا آغا حبیب، قاری غلام قاسم اور دیگر نے خطاب کیا اور کہا کہ ملت جعفریہ کے خلاف پوری دنیا میں انتقامی کاروائیوں کا سلسلہ جاری ہے، جس کا مقصد امریکہ و اسرائیل کو خوش کرنا ہے۔