اسلام ٹائمز - گلگت، طیارہ حادثے کی تحقیقات شروع کر دی گئی

گلگت میں سیفٹی انویسٹی گیشن بورڈ کی ٹیم نے طیارے کے مختلف حصوں کا جائزہ لیا۔ پی آئی اے کے انجینئرز پر مشتمل ٹیکنیکل ٹیم بھی گلگت پہنچ گئی ہے۔

اسلام ٹائمز۔ گلگت میں پی آئے اے کے اے ٹی آر طیارے کے حادثے کی تحقیقات کیلئے سیفٹی انوسٹی گیشن بورڈ کی ٹیم تشکیل دیدی گئی۔ گلگت میں سیفٹی انویسٹی گیشن بورڈ کی ٹیم نے طیارے کے مختلف حصوں کا جائزہ لیا۔ اس کے علاوہ پی آئی اے کے انجینئرز پر مشتمل ٹیکنیکل ٹیم گلگت پہنچ گئی ہے۔ ترجمان پی آئی اے کے مطابق ایس آئی بی کی تحقیقات مکمل ہونے اور ان کی اجازت کے بعد انجینئرنگ ٹیم طیارے کی جانچ کرے گی۔ پی آئی اے کی انجینئرنگ ٹیم طیارے کو پہنچنے والے نقصان کی رپورٹ تیار کرے گی۔ ترجمان نے مزید بتایا کہ گلگت میں پی آئی اے کا فضائی آپریشن معمول کے مطابق جاری ہے، تحقیقات مکمل ہونے تک اے ٹی آر کے حادثے پر کچھ کہنا قبل از وقت ہو گا۔ دوسری جانب رن وے سے پھسلنے والے طیارے کو کرین کی مدد سے سیدھا کیا گیا ہے جس کے بعد ماہرین کی ٹیم نے طیارے کا جائزہ لیا۔