QR Code

سعودی عرب اور امریکی بری افواج کی مشترکہ مشقیں اختتام پذیر

27 Jul 2019 09:56

مشقوں کے ڈائریکٹر کے مطابق مشقوں کی سرگرمیوں میں آرٹلری بریگیڈ، آرٹلری پلاننگ کے طریقہ کار، عسکری فیصلہ سازی کے عمل، فوج کی فیصلہ سازی کی صلاحیت ، بغیر پائلٹ ڈرون طیاروں کے استعمال کی صلاحیت اور فوجی آپریشن میں آرٹلری کے کردار پرتوجہ مرکوز رہی۔

اسلام ٹائمز۔ سعودی اور امریکی افواج کے درمیان دو ہفتوں سے جاری فوجی مشقیں اختتام پذیز ہوگئیں۔ تفصیلات کے مطابق سعودی امریکی بری افواج کی مشترکہ مشقیں شمالی ریجن میں کنگ خالد ملٹری سِٹی میں اختتام پذیر ہوئیں، اختتامی تقریب میں اعلیٰ عسکری حکام نے شرکت کی۔ غیر ملکی خبر رساں ادارے کے مطابق اس موقع پر سعودی رائل آرمی کے سربراہ لیفٹننٹ جنرل فہد بن عبداللہ المطیر اور امریکی فوج کی مرکزی کمان کے سربراہ لیفٹننٹ جنرل ٹیری فیرل بھی موجود تھے۔ لیفٹننٹ جنرل المطیر کا کہنا تھا کہ کمانڈر 2019ء کے نام سے ہونے والی مشقوں کا مقصد دونوں مسلح افواج کی دفاعی صلاحیت میں اضافہ، خطے میں قیام امن اور سلامتی کے لیے مشترکہ کارروائی کی صلاحیت پیدا کرنا اور ایک دوسرے کی دفاعی صلاحیتوں سے استفادہ کرنا ہے۔

دوسری جانب امریکی فوج کی مرکزی کمان کے سربراہ نے ان مشقوں میں شرکت پر اپنی مسرت کا اظہار کیا۔ انہوں نے کہا کہ یہ شان دار مشق دونوں ملکوں کے بیچ کئی برسوں سے جاری دوستی کا مظہر ہے، یہ دوستی جاری رہے گی اور مزید مضبوط ہو گی، میں مشق میں شامل ہونے والے تمام شرکاء کا شکریہ ادا کرتا ہوں۔ ادھر مشقوں کے ڈائریکٹر میجر جنرل محمد بن محسن السنانی نے بتایا کہ مشقوں کی سرگرمیوں میں آرٹلری بریگیڈ، آرٹلری پلاننگ کے طریقہ کار، عسکری فیصلہ سازی کے عمل، فوج کی فیصلہ سازی کی صلاحیت ، بغیر پائلٹ ڈرون طیاروں کے استعمال کی صلاحیت اور فوجی آپریشن میں آرٹلری کے کردار پرتوجہ مرکوز رہی۔ یاد رہے کہ یہ مشق ان مشترکہ مشقوں کی ایک کڑی ہے جن کا مقصد سعودی مسلح افواج کا اپنے دوست ممالک کے ساتھ مل کر لڑائی کی صلاحیت اور اہلیت میں اضافہ کرنا ہے۔

خبر کا کوڈ: 807334