اسلام ٹائمز۔ پاکستان تحریک انصاف میں گروپنگ کرنیوالے رہنماوں کیلئے پارٹی میں شکنجہ تیار، پارٹی میں گروپنگ کرنے، ڈسپلن کی خلاف ورزی اور ٹاسک پورا نہ کرنے پر کارروائی کی جائے گی۔ تحریک انصاف قیادت نے پارٹی کے اندر ڈسپلن کو برقرار رکھنے کیلئے ڈسپلنری کمیٹی بنانے کا فیصلہ کیا ہے، پارٹی میں ڈسپلن پر زیرو ٹالیرنس پالیسی اپنائی جائے گی۔ ذرائع کے مطابق پارٹی کے اندر گروپنگ اور کارکنوں کیساتھ بدتمیزی کرنیوالے رہنماوں کیخلاف کارروائی کی جائے گی۔ پارٹی آئین میں تجاویز دے دی گئیں، صوبے اور ضلع لیول پر ڈسپلنری کمیٹیوں کا قیام عمل میں لایا جائے گا، شکایت آنے کی صورت میں کمیٹی ایک ہفتے کے اندر فیصلہ کرے گی، شکایت کنندہ کو صفائی کا ایک موقع بھی دیا جائے گا۔ شکایت ثابت ہونے پر پارٹی ممبر شپ معطل کی جا سکے گی۔ ذرائع کا کہنا ہے کہ وفاق کی سطح پر کمیٹی شکایت کا جائزہ لیکر پارٹی عہدے سے ہٹانے کی سفارش بھی کرے گی۔