خوشاب، مریم نواز کی قیادت میں مسلم لیگ نون کی ریلی

اسلام ٹائمز۔ پاکستان مسلم لیگ نون کی نائب صدر مریم نواز کی قیادت میں خوشاب میں ریلی منعقد ہوئی۔ ریلی سے خطاب کرتے ہوئے مریم نواز نے اعلان کیا کہ جلد ہی اسلام آباد کی جانب مارچ کیا جائیگا۔ مارچ کا اعلان سن کر ہزاروں کی تعداد میں ریلی کے شرکاء نے نعرے لگائے۔ شرکاء نے گاڑیوں اور موٹر سائیکلوں کی بڑی تعداد کیساتھ مریم نواز کا استقبال کیا۔ ریلی میں بہت زیادہ رش کی وجہ سے رات ایک بجے مریم نواز نے ریلی کے شرکاء سے خطاب کیا۔ شرکاء نے فری نواز شریف اور گو سیلیکٹڈ گو کی تحریروں پر مبنی کتبے بھی اٹھا رکھے تھے اور شہر کو نواز شریف اور مریم نواز کی تصاویر والے بینرز سے سجایا گیا تھا۔ ریلی میں مقامی لیگی رہنماؤں اور اراکین اسمبلی نے بھرپور شرکت کو یقینی بنانے کیساتھ وسیع انتظامات میں بنیادی کردار ادا کیا۔ دوسری طرف پاکستان مسلم لیگ نواز کی نائب صدر مریم نواز کی 6 اگست کو سرگودھا میں ریلے کے حوالے سے ضلع بھر میں پارٹی دو دھڑوں میں تقسیم ہوگئی ہے۔ شہر کے مختلف مقامات پر لگائے گئے بینرز میں شہباز شریف کی تصاویر غائب ہیں اور صرف مریم نواز اور نواز شریف کی تصاویر لگائی گئی ہیں۔ ذرائع کے مطابق ضلع میں شہباز شریف کا حمایتی گروپ ریلی کے انتظامات سے مکمل طور پر لاتعلق ہے۔