شمالی کوریا نے گزشتہ ہفتے کیے گئے میزائل تجربات پر معافی مانگی ہے، ٹرمپ کا دعویٰ
11 Aug 2019 12:12
اس سے قبل امریکی صدر نے میزائل تجربات کو غیر اہم قرار دیا تھا کہ میں دوبارہ کہوں گا کہ یہ کوئی جوہری میزائل کے تجربات نہیں تھے بلکہ مختصر فاصلے تک مارنے والے میزائل تھے، میزائل بیلسٹک یا طویل فاصلے تک مارنے والے میزائل بھی نہیں تھے۔
اسلام ٹائمز۔ امریکا کے صدر ڈونلڈ ٹرمپ نے دعویٰ کیا ہے کہ شمالی کوریا کے رہنما کم جونگ ان نے گزشتہ ایک ہفتے کے دوران کیے گئے میزائل تجربات پر معافی مانگی ہے۔ خبر ایجنسی اے ایف پی کے مطابق امریکی صدر نے کہا کہ کم جونگ ان نے امریکا اور جنوبی کوریا کی مشترکہ عسکری مشقیں ختم ہونے کے بعد جوہری ہتھیاروں پر مذاکرات شروع کرنے کی خواہش ظاہر کی۔ واضح رہے کہ شمالی کوریا نے گزشتہ روز میزائل کا پانچواں کامیاب تجربہ کیا اور محض چند گھنٹے بعد ہی ڈونلڈ ٹرمپ کا کم جونگ ان سے متعلق بیان سامنے آگیا۔ امریکی صدر نے ٹوئٹ میں دعویٰ کیا کہ انہیں شمالی کوریا کے رہنما نے مراسلہ بھیجا ہے جس میں دوطرفہ مذاکرات کے آغاز پر زور دیا گیا۔ ڈونلڈ ٹرمپ نے اپنی ٹوئٹ میں کم جونگ ان سے جلد ملاقات کرنے کا بھی اظہار کیا۔ امریکی صدر کا کہنا تھا کہ شمالی کوریا کے رہنما نے واضح طور پر کہا کہ وہ ملاقات کرکے مذاکرات کا عمل جلد ازجلد بحال کرنا چاہتے ہیں۔
خبر کا کوڈ: 810063