QR Code

ایران پر امریکہ کے معمولی حملے کے جواب میں ایران کے شدید جوابی حملے کا خوف

اسرائیل، سعودی عرب اور متحدہ عرب امارات نے امریکہ کو ایران پر حملہ نہیں کرنے دیا، عرب و امریکی میڈیا

23 Aug 2019 11:54

عرب و امریکی نیوز ویب سائٹ "المانیٹر" نے اپنے ڈپلومیٹک ذرائع سے نقل کرتے ہوئے ایران کی فضائی حدود کے اندر سرنگوں کئے جانیوالے پیشرفتہ ترین امریکی ڈرون طیارے کے جواب میں ایران کے 3 مقامات کو نشانہ بنانے کے منصوبے سے امریکہ کی دستبرداری کی اصلی وجہ اسرائیل، سعودی عرب اور متحدہ عرب امارات کیطرف سے امریکہ کو بھیجے گئے "ایران کے شدید جوابی حملے کے خوف" پر مبنی پیغامات کو قرار دیا ہے۔

اسلام ٹائمز۔ عرب-امریکی نیوز ویب سائٹ نے اپنے سفارتی ذرائع کے حوالے سے فاش کیا ہے کہ ایران کیطرف سے اپنی فضائی حدود کے اندر پیشرفتہ ترین امریکی ڈرون طیارے "گلوبل ہاک" کو مار گرائے جانے کے جواب میں امریکہ کیطرف سے ایران کے 3 مقامات کو نشانہ بنانے کے منصوبے سے امریکی پسپائی کی اصلی وجہ آخری لمحات میں امریکہ کو بھیجے گئے اسرائیل، سعودی عرب اور متحدہ عرب امارات کے "معمولی امریکی حملے کے جواب میں شدید ایرانی جوابی حملے کے خوف" پر مبنی پیغامات ہیں۔ اس ویب سائٹ نے مزید لکھا ہے کہ امریکی صدر ڈونلڈ ٹرمپ نے اسرائیل اور خلیج فارس سے موصول ہونے والے ان پیغامات کے بعد وائٹ ہاؤس کے فیصلے میں تبدیلی لاتے ہوئے ایران پر حملے کو روک دیا تھا۔

اس ویب سائٹ کے سفارتی ذریعے کا کہنا تھا کہ اسرائیل، سعودی عرب اور متحدہ عرب امارات کی پریشانی کی اصلی وجہ یہ تھی کہ ان کے خیال میں اس بات کا قوی امکان موجود تھا کہ ایران پر ہونے والے "معمولی سے" امریکی حملے کے جواب میں ایران ان کے خلاف "شدید جوابی حملہ" کر دے گا، جبکہ وہ خود امریکہ کے کسی بھی معمولی سے حملے کی حد سے زیادہ قیمت چکانا نہیں چاہتے تھے۔ امریکی و عرب میڈیا کا خیال ہے کہ متحدہ عرب امارات اور سعودی عرب کے پیغامات سے قطع نظر جب اسرائیل کی طرف سے بھی خوف و ہراس پر مبنی پیغامات ملنا شروع ہوئے، تب امریکہ نے اپنے حملوں کو روک دیا۔

واضح رہے کہ امریکی صدر ڈونلڈ ٹرمپ نے سماجی رابطے کی ویب سائٹ پر ایران پر حملات کو روکنے کی وجہ یہ بتائی تھی کہ انہیں حملے شروع کرنے سے صرف 10 منٹ پہلے یہ پتہ چلا تھا کہ ان حملوں میں 150 ایرانی شہری مارے جائیں گے، لہذا انہوں نے حملے روک دیئے، جس کے بعد امریکی و انٹرنیشنل میڈیا میں ڈونلڈ ٹرمپ کے اس بیان پر شدید تنقید کی گئی تھی اور اسے ناقابل قبول قرار دیا گیا تھا۔

خبر کا کوڈ: 812205