اسلام ٹائمز۔ سکردو سے راولپنڈی جانے والی مسافر بس کو بابوسر کٹی داس کے مقام پر حادثہ، 26 افراد جاں بحق جبکہ 10 زخمی ہو گئے۔ ریسکیور زرائع کے مطابق افسوسناک حادثہ صبح پونے آٹھ بجے کے قریب پیش آیا، مسافر بس کا بریک فیل ہونے سے کٹی داس کے مقام پر چٹان سے ٹکرا گیا جس کی وجہ سے 26 افراد جاں بحق ہو گئے، جاں بحق ہونے والوں میں 8 بچے بھی شامل ہیں۔ نجی کمپنی مشہ بروم کی بس بابوسر کے راستے سکردو سے راولپنڈی جا رہی تھی، بریک فیل ہونے سے یہ حادثہ پیش آیا، زخمیوں اور لاشوں کو چلاس ہسپتال منتقل کیا جا رہا ہے جہاں سے آرمی ہیلی کاپٹر کے زریعے لاشوں کو سکردو اور زخمیوں کو سی ایم ایچ گلگت منتقل کیا جائے گا۔ ریسکیو اور مقامی لوگ امدادی سرگرمیوں میں مصروف ہیں۔ بس میں پاک فوج کے 12 جوان سمیت کئی خواتین بھی موجود تھیں۔ ترجمان گلگت بلتستان حکومت فیض اللہ فراق نے 26 افراد کے جاں بحق ہونے کی تصدیق کر دی ہے۔