اسلام ٹائمز - لوگ دل کھول کے عطیات دیتے ہیں لیکن ٹیکس نہیں دیتے، گورنر سندھ

لوگ دل کھول کے عطیات دیتے ہیں لیکن ٹیکس نہیں دیتے، گورنر سندھ

کراچی میں میڈیا سے گفتگو کرتے ہوئے گورنر عمران اسماعیل نے کہا کہ متحدہ قومی موومنٹ سے متعلق فواد چوہدری کی بات سے پی ٹی آئی اور ایم کیو ایم کے درمیان ماحول خراب ہوا ہے۔

اسلام ٹائمز۔ گورنر سندھ عمران اسماعیل کا کہنا ہے کہ متحدہ قومی موومنٹ پاکستان سے متعلق فواد چوہدری کی بات سے پی ٹی آئی اور ایم کیو ایم کے درمیان ماحول خراب ہوا ہے۔ کراچی میں میڈیا سے بات کرتے ہوئے گورنر سندھ کا کہنا تھا کہ پاکستان میں لوگ دل کھول کے عطیات دیتے ہیں لیکن ٹیکس نہیں دیتے، شوکت خانم اسپتال میرے دل میں ہے، ہماری خواہش تھی کہ شوکت خانم کراچی میں بنے، کراچی سے لوگ علاج کیلئے باہر جاتے تھے، دنیا میں ایسے ادارے کم ہیں جہاں کینسر کا علاج مفت کیا جا سکے، شوکت خانم وہ ادارہ ہے جس نے چندے میں کبھی خیانت نہیں کی، جب تک کینسر کی آگاہی نہیں ہوگی اس کا علاج ممکن نہیں ہو سکے گا۔ عمران اسماعیل نے کہا کہ ایم کیو ایم اور پی ٹی آئی میں کچھ نہیں چل رہا، خواجہ اظہار سے کل بات ہوئی فواد چوہدری نے جو بات کی، اس سے ماحول خراب ہوا، وزیراعظم سے بات کریں گے اور اس سے ہمارا اتحاد متاثر نہیں ہوگا۔

شہر کراچی میں اسٹریٹ کرائمز کی بڑھتی وارداتوں پر گورنر سندھ کا کہنا تھا کہ ہم نے کراچی میں بوری بند لاشوں کا دور بھی دیکھا ہے، کراچی میں اسٹریٹ کرائم ایک مرتبہ پھر بڑھ گیا ہے، لیکن آئی جی سندھ اور ایڈریشنل آئی جی کراچی اسٹریٹ کرائم کم کرنے کی کوشش کر رہے ہیں، ہم ہر گلی کے کونے پر پولیس اہلکار کو تعینات نہیں کرسکتے۔ گورنر سندھ نے کہا کہ جو بھی کراچی میں کچرے کی بات کرتا ہے، ہم ان کے ساتھ ہیں، سندھ سالڈ ویسٹ مینجمنٹ بورڈ مکمل طور پر ناکام ہوا ہے، کچرا اٹھانا کے ایم سی کا کام ہے اسے کرنے دیا جائے۔ واضح رہے کہ فواد چوہدری نے کہا تھا کہ کراچی میں ایم کیو ایم کا جلد صفایا ہو جائے گا، آئندہ بلدیاتی انتخابات میں پیپلز پارٹی اور تحریک انصاف کے درمیان مقابلہ ہوگا، جس پر ایم کیو ایم پاکستان کی قیادت کی جانب سے شدید ردعمل سامے آیا تھا۔