QR Code

آوارہ کتوں کی بہتات و ڈینگی کی ذمہ داری بھی سرفراز احمد پر ڈال دی جائے، فاروق ستار

19 Oct 2019 14:36

کراچی میں انسدادِ دہشتگردی کی عدالت کے باہر میڈیا سے گفتگو کے دوران ایم کیو ایم کے سابق کنوینر نے کہا کہ کراچی کے میئر وسیم اختر صرف اختیارات کا رونا روتے ہیں، اگر اختیارات نہیں تو استعفیٰ دے کر عوام کے ساتھ کھڑے ہوتے، میئر شپ ختم ہونے کے بعد خالد مقبول صدیقی اور عامر خان نہیں بچائیں گے۔

اسلام ٹائمز۔ متحدہ قومی موومنٹ کے سابق کنوینر ڈاکٹر فاروق ستار کا کہنا ہے کہ آوارہ کتوں کی بہتات و ڈینگی کی ذمہ داری بھی سرفراز احمد پر ڈال دینی چاہیئے۔ کراچی میں انسدادِ دہشتگردی کی عدالت کے باہر میڈیا سے گفتگو کے دوران فاروق ستار نے کہا کہ ملک کا سیاسی منظرنامہ عجیب و غریب ہے، حکومت کے خلاف اپوزیشن ایک طرف ہے، اپوزیشن اور حکومت پر اس وقت بھاری ذمہ داری عائد ہے، ملکی معیشت کا بیڑا غرق ہوگیا ہے، میرا سوال یہ ہے کہ اس حکومت کو گرا کر اگلا لائحہ عمل کیا ہوگا؟ مولانا فضل الرحمان کے مارچ کے نتیجے میں موجودہ حکومت اگر گر بھی جائے تو ملکی معیشت کہاں جائے گی؟ صحت، تعلیم اور صفائی کے مسائل کا حل کون کرے گا۔ سرفراز احمد کو قیادت سے ہٹانے کے سوال پر فاروق ستار نے کہا کہ پاکستان کی کرکٹ ٹیم کے کپتان سرفراز احمد کو دو تین میچز کی کارکردگی کو بنیاد بنا کر ہٹانا غلط ہے، اس اقدام سے تعصبانہ سوچ کی بو آتی ہے، کراچی میں آوارہ کتوں کی بہتات اور ڈینگی کی ذمہ داری بھی سرفراز احمد پر ڈال دینی چاہیئے۔

خبر کا کوڈ: 822920